VOV4.Xơ Đăng - Troh ƀă pơlê kong kơdrâm Plei Ku tung roh pơtê leh Hâi mơjiâng tơnêi têa lơ 2/9, tơmối ôh tá păng lôi tíu ôm hyô lĕm mơnâ mâ ngăn Biển Hồ, châ tối cho ‘’Péa pâ mâ Plei Ku’’. Rơtế ngăn ki lĕm kong kế, lăm ngăn mâu pơlê tiô khôi vâi krâ nah môi tiah teăn rơneăm, teăn hmân ếo pơtâk, tơmối ối châ kâ mâu kơchâi kâ ki kơhiâm dêi mơngế Jarai ƀă châ tơmâng hơdruê, rơngêi hdroâng vâi krâ nah.

*** Kơtăn Biển Hồ dâng 1km, Tíu tê í pôh Plit a pơlê Têng 1, cheăm Tân Sơn, pơlê kong kơdrâm Plei Ku, kong pơlê Gia Lai xua môi rơpŏng mơngế Jarai po kơtăn kố lối chât hơnăm. Vâ tơdah tơmối tung roh pơtê leh lơ 2/9. Jâ H’Nach rơtế ƀă  mâu ngế pêi cheăng kơpuih văng krúa lĕm, ƀă hbrâ mâu tơmeăm kâ ki kơhiâm dêi mơngế Jarai.

“Tung mâu hâi leh kân tung tơnêi têa, ƀă ki rơhêng vâ tối cho Têt tơniăn krê lơ 2/9, kuăn pơlê tung pơlê hmâ hbrâ hên tơmeăm kâ kơhiâm. Ngin hbrâ hơ’nêh í, chăm ƀă mâu tơmeăm kâ tiô khôi vâi krâ nah mơngế Jarai môi tiah kơchâi tơpoăng ƀă mâu kơchâi kâ ing mâu kơchâi drêh kêi ing chiâk deăng, kong kế.

Pơtih kơchâi mon, tơxông, ƀă mâu kơchâi kâ ing tơpăng châ kuăn pơlê tăng đôu tung kong. Krê kơchâi kâ ing tơpăng, drêng tơdah tơmối mê ngin kô pế hên kơchâi tơ-ê dêi pó, ai ki khó ƀă hơ’nêh lơ pế tơpoăng xuân hôm’’.

Tíu tê í pôh Plit a pơlê Têng 1, cheăm Tân Sơn, pa kĭng pơlê kong kơdrâm Plei Ku, châ mơjiâng a kơpong tơnêi kân rơdâ 4000 met karê. Nhên khât, mê cho kơpong kơdrum dêi môi rơpŏng mơngế Jarai, xua pôa Ama Kiet pơkuâ. Kơpong kơdrum châ mơjiâng pro môi tiah môi kơdrum reăng kŭn, ƀă mâu toăng hngêi trá lĕm, krê xêh. Rêm toăng hngêi kân rơdâ châ to lâi chât met karê tŭm ăm mâu khu tơmối troh xah hêi tơkŭm dêi pó vâ kâ mâu kơchâi kâ dêi kơphô̆ ngo.

Pâ Kiêt tối:

“Ngin po hngêi mơdró ôu kâ xuân tiô khôi túa pế kơchâi kâ dêi mơngế Jarai. Akố pế ăm tơmối mâu kơchâi kâ dêi mơngế Jarai, mê cho kơchâi mon. Tiah hmâ kơchâi hlá mon ngin xao ƀă klêa í, râm tơ’nôm plăng, trŏng kong ƀă reăng plâi hung. Má péa nếo, cho kơchâi kong pế tơdjuôm ƀă kơteăm rup drô têa plông, klâng. Ƀă tơmeăm kâ tơxông mê xúa tơxông pêt tung chiâk deăng. Ngin rôe tơxông ing kuăn pơlê, tiah hmâ mê rah mâu tơxông xú hŏm má môi.

Tơxông ahdrối vâ prông mê ngin tâm tung têa môi pơla kơ’nâi mê ko phêa vâ prông, pakĭng tơxông prông, mê ai í. Í châ rôe ing kuăn pơlê tung pơlê. Ing kơxo má, kuăn pơlê djâ, hmâ sap ing 10 – 20 to í. Kố cho í ing kuăn pơlê păn a mâu pơlê tung cheăm H’Bâo, cheăm Chư Dang Ya. Tơmeăm râm mâu hơ’nêh pôh mê ngin xúa êi kêi ing chiâk deăng, tơ’nôm hlá ngò pế tơdjuôm ƀă po, hăng, hơkĕm hơ’nêh í, hơ’nêh pôh’’.

A kơdrum cho plông nhâ ki kân rơdâ. Tung dế plông ai loăng kân ki xŏn, cho tiú ki vâ tơkŭm tơbleăng tối mâu tơdroăng mơdĭng khôi hmâ dêi mơngế Jarai, ƀă mâu tơdroăng cheăng môi tiah tŏn chêng koăng, kơhnhon xuâng a kĭng hơpiâp on, ƀă mơđah tơbleăng mâu prôa, chuât tíu tơdrá tiô khôi chal vâi krâ nah.

“Drêng vâ tơdah tơmối mê ngin kô hbrâ rơnáu hdrối mâu ƀai ki vâ mơđah tơbleăng, xah hêi rơtế ƀă mâu tơmối la xuân ối tiô tơdroăng ki pâ thế dêi mâu tơmối cho hdrối tâ, mê cho tŏn chêng tôu koăng, chêng không, têng nêng, kơhnhon xuâng tâ tá on. Xuân ngăn tiô tơdroăng ki pơkâ thế dêi tơmối, ai drêng ‘nâ vâ pâ thế ngin hơdruê mâu ƀai hơdruê ki hơniâp ro ‘na Tây Nguyên vâ tơmối châ hmâng ƀă rơtế veăng kơhnhon xuâng”.

Ama Kiet tơbleăng ‘na tơdroăng mơhno túa lĕm tro Jarai

Pakĭng tơbleăng tối ‘na khôi túa lĕm tro dêi mơngế Jarai, rơpŏng pôa Ama Kiet a pơlê Têng 1, cheăm Tân Sơn, pa kĭng pơlê kơdrâm Plei Ku xuân cho tíu ki vâ tăng cheăng pêi ăm hên kuăn muăn a kong pơlê. Tơdrêng amê kố xuân cho tíu ki vâ tê mâu kế tơmeăm xua tơná kuăn pơlê Jarai pro sap ing păn mơnăn, pêt kế tơmeăm, krí xo kế tơmeăm ing chiâk deăng.

“Klêi kơ’nâi pơreăng COVID-19, ai hên droh rơtăm ôh tá ai cheăng pêi. Hên muăn hriâm klêi la xuân tá hâi ai cheăng pêi, lăm pêi cheăng hngế mê xuân xơpá, lơ tá hâi ai cheăng pêi ki tơná vâ. Xua mê, á pro tơ’lêi hlâu tŏng kum tŏng kum tơdroăng cheăng pêi vâ pêi lo liăn ƀă ai liăn vâ xúa tung rêh ối rêm hâi. Môi tơdroăng cheăng nếo á hmâ roê í dêi vâi krâ nhŏng o, drêng vâi krâ nhŏng o kal liăn, kal tê drêng lâi xuân hbrâ rơnáu roê xo ki vâi”.

Jâ H’Nach hbrâ mâu kế kâ xo ing tơpăng kong

Maluâ bu môi to kuăn ki kŭn dêi rơpŏng mơngế Jarai, la mâu tơdroăng cheăng akố dế kum mơnhông kơvâ ôm hyô dêi pơlê kong kơdrâm Plei Ku kong pơlê Gia Lai. Ing mê, kum tăng cheăng pêi ăm kuăn pơlê a kong pơlê, hlối rak vế ƀă mơdêk tơdroăng ki mơhno túa lĕm tro ki lĕm tơviah dêi mơngế Jarai.

Quốc Học – Nay Jek chêh

A Sa Ly - Katarina Nga tơplôu ƀă tơbleăng