VOV4.Xơ Đăng - Bú ối to lâi hâi nếo, Hneăng tơ’noăng ivá Đông Nam Á roh má 31 (SEA Games 31) kô pơxiâm po. SEA Games rôh kố châ tơkŭm po a Hà Nội ƀă 11 to kong pơlê, pơlê kong kân ki achê ƀă veăng ai lối 7.800 ngế tơ’noăng, mâu ngế hnê pơtâp ivá, kăn ƀô̆ dêi 11 khu tơ’noăng ivá dêi mâu kong têa tung kơpong. Pơlê kong xiâm Hà Nội cho tíu ki kal, tíu tơkŭm pơxiâm po, ƀă mơgêi 18 môn tơ’noăng a 14 tíu, xua mê, tơdroăng hbrâ pêi pro thâ ƀă hiăng klêi tâng, ối hbrâ tơkôm vâ tơ’noăng.

A Bắc Giang, Hngêi tơ’noăng ivá kong pơlê hiăng klêi tơdroăng hbrâ ăm mâu rôh tơ’noăng peăng pĭng pŏng SEA Games 31 ing hâi lơ 16 troh lơ 25/ 5. A Hải Dương, môn peăng ƀa lŏng châ tơkŭm po tơ’noăng a Hngêi tơ’noăng Hải Dương ing hâi lơ 13- 20/5. Kong pơlê hiăng hbrâ kơxô̆ liăn dâng 10 rơtal liăn tơ’nôm, ‘mâi rơnêu, mơdêk mâu tơmeăm a kơpong hngêi tơ’noăng. A kong pơlê Hòa Bình tơdroăng hbrâ môn tơ’noăng chuâ rơxế mái (SEA Games 31) hiăng hbrâ rơnáu. Malối, a Phú Thọ, Hngêi tơ’noăng kong pơlê hiăng hbrâ tơkŭm po mâu rôh tơ’noăng kơtu ƀa long U23 + 3  SEA Games 31.