VOV4.XơĐăng - Kơxo lơ 28/12, Khu ngăn mơhno túa lĕm tro – Tơ’noăng ivá ƀă Ôm hyô kong pơlê Dak Lak tơkŭm po leh tơdah xo ƀâng chêh inâi tíu xối tơbâ ton nah râ kong pơlê ƀă tíu xối tơbâ ton nah tíu pêi cheăng Vi ƀan pơxiâm cheăng kong pơlê Dak Lak hơnăm 1945. Tíu xối tơbâ ton nah cho Tíu pêi cheăng Vi ƀan pơxiâm cheăng kong pơlê Dak Lak 1945 châ pro a tíu 71 Lý Thường Kiệt, pơlê kong kơdrâm Ƀuôn Ma Thuột.

Châ pro sap ing hơnăm 1943, kố cho hngêi dêi pôa Đầu Viết Chúc, môi tíu cheăng kăch măng dêi Việt Minh. Sap ing hơnăm 1944, tíu kố hiăng chiâng tíu ki tơpui pơtroh tơdroăng pơkí dêi Việt Minh a Dak Lak ƀă kơpong peăng tơdế Tơnêi têa, păn roăng, kơtoâ hên mâu lêng kăch măng. A kong măng lơ 19/8/1945, a kố hiăng po Rôh hôp tơdrêng dêi Khu kăn pơkuâ pơtân kong pơlê Dak Lak, tơbleăng pơkâ ‘na tơdroăng châ pơkuâ a râ kong pơlê, veăng tơrŭm môi tơdroăng ki ƀlêi trâng tung Kăch măng khế 8 hơnăm 1945 dêi tơnêi têa.

Rơtế ƀă tơdroăng châ chêh inâi tíu xối tơbâ râ kong pơlê, tíu xối tơbâ tíu pêi cheăng Vi ƀan kong pơlê Dak Lak 1945 châ pơcháu ăm khu kăn pơkuâ pơlê kong kơdrâm Ƀuôn Ma Thuột rak ngăn, ‘no liăn ‘mâi rơnêu ƀă mơnhông ki kơnía, kum ăm tơdroăng ki hnê hriâm tơdroăng ton nah ƀă ôm hyô.

Katarina Nga tơplôu ƀă tơbleăng