VOV4.Sêdang - Pôa Lê Minh Hoan, ngế xiâm ngăn chiâk deăng ƀă Mơnhông thôn pơlê nếo ai rôh pêi cheăng ƀă kong pơlê Hậu Giang ‘na tơdroăng ki pêi chiâk deăng a kong pơlê kố. A rôh pêi cheăng, pôa Lê Minh Hoan pơkâ thế kong pơlê Hậu Giang rĕng ai troăng hơlâ pêi hơ’lêh sap ing tơdroăng ki tơmiât pêi chiâk deăng ngi tơdroăng ki rak vế cheăng kâ vâ mơdêk ki kơnía dêi mâu kế tơmeăm ăm kuăn pơlê.

Tung mê, ôh ti xê to pêi pêt môi túa hdrê mê ai tơdroăng ki pêt tơkŭm ki hên hdrê tung rơtế môi ƀăng tơnêi pêt vâ hơ’lêh sap ing tơdroăng ki pêt môi hdrê ngi hên hdrê pêt mơjiâng tơkŭm, ing mê, tơkŭm châ ki kơnía tung pêt mơjiâng kế tơmeăm. La ngiâ ah, Khu xiâm ngăn chiâk deăng ƀă mơnhông thôn pơlê kô kum kong pơlê Hậu Giang pêi pro túa pơkâ “Kơpong pêt tơrŭm kơvâ cheăng tơdjuôm – pêi chiâk deăng tơtro ƀă tơdroăng mơnhông ôm hyô kong kế” vâ tơkŭm ki kơnía a  kơlo ki tro má môi.

Katarina Nga tơplôu ƀă tơbleăng