VOV4.Sêdang - Pơlŭm, cho môi hdrê ká ki tê châ kơnâ liăn, kuăn pơlê a kong pơlê Lâm Đồng hiăng mơnuá păn tung klôh. Ƀă troh mơ’nui, vâi hlo pơlŭm xuân rơdêi, rêh, chiâng kân, vâi krâ-nhŏng o akố tơngah a la ngiâ ah kô djâ hdrê pơlŭm kố vâ pơtối păn i hên luâ tâ kơ mê nếo.

Ngoh Trần Hữu Tự, thôn Tân Hóa 2, cheăm Lộc Nga, pơlê kong kơdrâm Bảo Lộc, kong pơlê Lâm Đồng cho rơpŏng hiăng rơkê păn ká têa long vâ tê môi tiah ká ilá Xuăn, ká mơdâu, ká trăm. Hơnăm 2020, tiô hnê mơhno dêi kăn ƀô̆ mơhnhôk pêi chiâk deăng, ngoh mơnúa păn pơlŭm, môi hdrê ká ki nếo ƀă tâi tâng cho rơpŏng păn ká kơpong kong ngo. Mê apoăng ăm hlo, klôh têa hngêi ngoh cho tíu pơlŭm rêh ƀă xông kân lĕm.

Bu ƀă klôh têa kân rơdâ vâ chê 2 sao, khế 6 hơnăm 2020, ngoh hiăng kơ’nêi 2.000 to hdrê pơlŭm. Hdrê ká xua Tíu xiâm mơhnhôk pêi chiâk deăng kong pơlê Lâm Đồng tŏng kum, tíu xiâm ối tŏng kum tơ’nôm 70% kơxô̆ tâk ăm ká kâ xuân môi tiah hnê kih thuât rak ngăn.

Ngoh tối:

“Pơlŭm drêng kơ’nêi tung klôh hngăm dâng 7 – 8 gram/môi to, môi kilô mê dâng 150 to. Klêi kơ’nâi 10 khế păn, pơlŭm kâng hngăm 1,4kilô/môi to, cho xông kân lĕm”.

Tiô ngoh Tự, pơlŭm cho khu ká lăm tăng kâ mơdrăn a kơmăng. Drêng ối kŭn, pơlŭm kâ tâk tê. Drêng kân tâ, pơlŭm kâ mâu ká ku kŭn, xing xŏng kŭn ƀă hía hé, tơ’lêi rak ngăn ƀă ôh tá ai pơreăng. Ká rêh ối a kơdó têa xua mê têa a ngâ kô chiâng kơ’nêi ká kâ ki a ngâ môi tiah ká trăm, ká ilá Xuăn.

Ngoh Tự tối ăm ‘nâi, ahdrối kơ’nêi ká, ngoh mơgrúa klôh ká inhên, xế puâ, rơvât phon hưh cơ vâ têa krúa lĕm, hên trếo piê kơhiâm. Klôh mê ai tíu ‘mot têa, mơ’no têa a têa plông Lộc Nga xua mê têa krúa ƀă châ pơ’lêh đi đo. Xua mê, khu pơlŭm gá rêh ối tung têa long krúa lĕm, ôh tá ai pơreăng. Pakĭng mê, ngoh Tự ối păn hên ká ilá hdrê Xuăn. Hdrê ká ilá Xuăn kâ a ngâ têa, hên ká ilá Xuăn ai kơtâ, kơtâ chiâng ká kuăn, mê pro kế kâ ăm pơlŭm rêh ối a kơdó têa.

Ngoh Nguyễn Văn Thành, kăn ƀô̆ Tíu xiâm mơhnhôk pêi chiâk deăng kong pơlê Lâm Đồng tối ăm ‘nâi, pơlŭm Xuăn tối cho ká Nheo cho ká ai kéa gá chí. Châ ká kân, hên trếo piê kơhiâm, hơ’nêh xú kơhiâm, châ kơchơ tê mơdró hâk vâ xua mê, tung mâu têa plông, têa kroăng vâi tăng rup hên, mê ká hiăng kơdroh hên.

Xua mê, Tíu xiâm pêi pro tuá “Păn pơlŭm ki vâ tê tung klôh têa” vâ mơnúa păn ká ki kơnâ liăn kố.

Ƀă túa hiăng châ pêi pro, riân yă tê dâng 90 rơpâu liăn/kilô pơlŭm tê tung kơchơ mơdró, drêng rup tê ká mâu rơpŏng kô châ xo sap ing 140 – 160 rơtuh liăn/rơpŏng. Châ tơƀrê ing túa păn kố ăm hlo, mâu pơlê ai tíu tơtro kô păn pơlŭm vâ tê. Tuá pêi hiăng kum kuăn pơlê rah xêh tơ’nôm ká ki vâ păn vâ pơ’lêh păn ká ki hmâ păn, ing mê mơdêk ki dâi lĕm dêi ká, rế hía rế châ hên kơchơ tê mơdró tung kong pơlê Lâm Đồng hâk vâ rôe.

Hlá tơbeăng Lâm Đồng

A Sa Ly tơplôu ƀă tơbleăng