Khĕn kơdeăn ƀă mơnê mâu hnoăng veăng ‘no dêi mâu kuăn pơlê pêi cheăng kơhnâ rơkê hơnăm 2024, pôa Lương Quốc Đoàn, Kăn hnê ngăn Tíu xiâm Khu ngăn kuăn pơlê pêi chiâk Việt Nam tối, tung pơla mơnhông  cheăng kâ, hnoăng cheăng dêi mơngế ki pêi chiâk, dêi kuăn pơlê pêi chiâk ai mâu hnoăng veăng ‘no kân kĭn tung tơplâ dêi Kăch măng, mơjiâng ƀă kring vế tơnêi têa.

Ai tiô pơkâ cheăng tiô túa nếo nôkố, pôa Lương Quốc Đoàn, Kăn hnê ngăn Tíu xiâm Khu ngăn kuăn pơlê pêi chiâk Việt Nam púi vâ, kuăn pơlê ki pêi chiâk ƀă mâu khu tơrŭm cheăng kơhnâ rơkê hơnăm 2024 pơtối rak hnoăng cheăng xiâm, pơkuâ djâ troh lâp lu, mơhnhôk kuăn pơlê ki pêi chiâk tơ’noăng  mơjiâng thôn pơlê rêh ối cheăng kâ tiô túa nếo.