VOV4.Xơ Đăng - Kơ koan xiâm pơkuâ loăng pơlái kong kế, Khu xiâm pơkuâ ‘na pêi chiâk deăng ƀă Mơnhông thôn pơlê tối ăm ‘nâi, kơxô̆ liăn tê loăng ngi kong têa ê a khế 7 châ 1,41 rơtal dollars Mih, kơdroh 5,5% tâng pơchông ƀă khế 6 ƀă kơdroh 1,6% tâng pơchông ƀă roh kố hơnăm nah. Mơhé tiah mê, riân tơdjuôm 7 khế hiăng hluâ, kơxô̆ liăn tê ngi kong têa ê loăng xuân tâk 1,3% tâng pơchông ƀă roh kố hơnăm nah, tiô tối hdrối châ 10,42 rơtal dollars Mih.

Tung 7 khế, loăng ƀă tơmeăm ing loăng tê ngi 110 kong têa ƀă kơpong. Tung mê, mâu kong têa ki châ tê troh, mê cho: Mih, Nhuk, Sinuâ, Khu tơrŭm châu Âu, Hàn Quốc pơtối cho mâu kong têa ki tê xiâm, châ 90% tâi tâng  kơxô̆ liăn châ xo tê ngi kong têa ê dêi lâp tơnêi têa. Krê kong têa Mih, kong têa châ hên kơxô̆ liăn tê loăng a kong têa kố mê hiăng kơdroh rơdêi ƀă 4,9% tâng pơchông ƀă roh kố hơnăm nah xua mê pro ki tơtêk tê ngi kong têa ê loăng sap apoăng hơnăm troh nôkố.

A Sa Ly tơplôu ƀă tơbleăng