VOV4.Xơ Đăng - Kơxo lơ 22/4, Khu pơkuâ ‘na pêi mơjiâng kơphế Ƀuôn Ma Thuột, kong pơlê Dak Lak tơkŭm po Roh tơ’noăng kơphế xú kơhiâm Việt Nam roh má pŭn, tiô troăng mơ’no tơdrêng tung um tiô troăng hyôh Internet tơdjêp 3 tíu hrik hyôh: Ƀuôn Ma Thuột, pơlê kong kân Hồ Chí Minh ƀă Hà Nội. Kơxô̆ tơmeăm tơ’noăng ƀă khu veăng tơ’noăng hơnăm kố hên tâ tâng pơchông ƀă 3 xôh tơkŭm po hdrối. Klêi kơ’nâi 6 khế mơhnhôk pêi pro, roh tơ’noăng mơhnhôk 48 khu veăng tơ’noăng ƀă 83 tơmeăm kơphế troh ing 7 kong pơlê, pơlê kong kơdrâm pêi kơphế.

Mâu kăn teăng mâ veăng a tíu hrik hyôh pơlê kong kơdrâm Ƀuôn Ma Thuột, kong pơlê Dak Lak

Roh tơ’noăng tah lôi, mơnhên ki dâi lĕm mơnúa ôu ngăn tơkŭm po sap hâi lơ 22 troh 27 khế 4. Roh tơ’noăng má mơ’nui ƀă diâp pro, mơgêi hneăng tơ’noăng a hâi lơ 30/4 la ngiâ. Roh tơ’noăng vâ pơ-ôu pơ-eăng mâu ngế pêi kơphế, tơmeăm kơphế dâi lĕm ƀă khu pêi kơphế ki xú kơhiâm; tơbleăng tơmeăm kơphế ki xú kơhiâm Việt Nam troh mơngế rôe xúa, khu kơ-óu tung tơnêi têa ƀă kong têa ê.

A Sa Ly tơplôu [ă tơbleăng