VOV4.Xơ Đăng - Môi tung mâu pơkâ a Pơkâ kơxô̆ 19 dêi Hneăng hôp roh má 5 Khu xiâm pơkuâ Đảng hneăng má XIII ‘na chiâk deăng, kuăn pơlê pêi chiâk – rêh ối thôn pơlê troh hơnăm 2030, tơmiât pêi troh hơnăm 2045 mê cho pêi kêi đeăng troăng pơkâ pêi, troăng hơlâ ‘na chiâk deăng, kuăn pơlê pêi chiâk deăng – rêh ối thôn pơlê. Tung mê, ai tối nhên troh pơtối ‘măn kơxô̆ liăn ăm mung kơjo, mơhnhôk mâu khu ăm mung liăn ăm mung ƀă chiâk deăng, kuăn pơlê pêi chiâk deăng, rêh ối kuăn pơlê; tŏng kum kơxô̆ liăn ăm mung ăm khu tơrŭm cheăng, khu tê mơdró, rơpŏng kuăn pơlê rêh ối mơnhông mơdêk mơjiâng tơmeăm khoăng tê mơdró ƀă hía hé.

A Pơkâ 29 môi xôh nếo tối rơdêi troh hnoăng cheăng dêi Agribank, Hngêi arak liăn kum rêh ối pơlê pơla pơtối pro ăm pơxúa tâ mê nếo tung xing xoăng ăm mung liăn ƀă mâu rơpŏng pêt mơjiâng tơmeăm ing pêi chiâk deăng, ki má lối cho ƀă rơpŏng kơtiê ƀă mâu khu ai hnoăng tơnêi têa; kum mơdât, teăm tơleăng tơdrêng tơdroăng ăm mung liăn xo liăn tơkâ kơnâ ó.

Hvái ngăn troăng prôk lối 34 hơnăm mơjiâng ƀă mơnhông mơdêk, tơdroăng veăng kum dêi Agribank ƀă hnoăng xiâm tung tíu ăm mung liăn ƀă ăm mung liăn kum tung chiâk deăng, kuăn pơlê pêi chiâk deăng, rêh ối drêng hngêi arak liăn đi đo rak tơdroăng mơ’no liăn cheăng ‘’Chiâk deăng – kuăn pơlê pêi chiâk – rêh ối thôn pơlê’’ châ vâ chê 70% tâi tâng kơxô̆ liăn chĕn ăm tơdroăng cheăng kâ, châ hên má môi tung ăm mung liăn mơ’no pêi chiâk deăng, kuăn pơlê rêh ối a Việt Nam ai kơnâ cheăng kâ, kal kí ƀă rêh ối pơlê pơla trâu hơngế. Kơnôm kơxô̆ liăn dêi Agribank, kuăn pơlê pêi chiâk deăng ƀă tơdroăng rêh ối kuăn pơlê tơtêk kơnôm pêt môi túa plâi, pơ’lêh tơdroăng pêi cheăng ƀă kuăn pơlê pêi chiâk deăng – mâu ‘’ngế pú hmâ ki rơtế’’ dêi Agribank rế hía rế xông kân, ‘nâi mơ-eăm xêh huăn ing kơtiê kơklêa ƀă mơ-eăm pro kro mơdrŏng a tơnêi pơlê xiâm dêi tơná.

Ƀă hnoăng cheăng kum mơnhông pêi chiâk deăng, kuăn pơlê pêi chiâk deăng, kuăn pơlê rêh ối kơpong pêi chiâk deăng, Agribank đi đo prôk hdrối, cho hngêi arak liăn ki xiâm pêi pro châ tơƀrê mâu tơdroăng ăm mung liăn, 02 tơdroăng pơkâ pêi troh tơnêi têa ‘na mơjiâng thôn pơlê nếo ƀă kơdroh kơtiê krá tơniăn. Nôkố, Agribank pơtroh ăm lối 200 tơmeăm kum ăm tơdroăng kal vâ ngân arak liăn kum ăm kuăn pơlê, ai veăng hên mơnhông mơdêk kơchơ tê mơdró chêl liăn ôh tá xúa liăn a ngâ, mơdêk ivá châ achê ƀă hngêi arak liăn ăm tơdroăng cheăng kâ, ki rơhêng cho a kơpong kơvâ chiâk deăng, kuăn pơlê pêi chiâk deăng, rêh ối kuăn pơlê. Lối 34 hơnăm mơjiâng ƀă mơnhông mơdêk, Agribank hiăng rak tơdroăng tơtêk tơniăn pêi kâ, troăng pêi, dâi lĕm ƀă châ tơƀrê tung pêi cheăng. Riân troh khế 6/2022, tâi tâng kơxô̆ liăn mơhnhôk dêi Agribank châ lối 1,62 rơtuh rơtal liăn, kơxô̆ liăn ối chĕn ăm mung pêi cheăng kâ châ lối 1,39 rơtuh rơtal liăn.

Tung mê, kơxô̆ liăn ối chĕn a hngêi arak liăn pêi chiâk deăng, kuăn pơlê pêi chiâk deăng châ lối 896 rơpâu rơtal liăn, châ vâ chê 70% tâi tâng kơxô̆ liăn ối chĕn a hngêi arak liăn.Ƀă kơxô̆ liăn tơniăn, hngêi arak liăn đi đo rơtế ƀă kuăn pơlê pêi chiâk deăng tung lâp tơnêi têa, tơniăn kơxô̆ liăn kum mơnhông mơdêk mơjiâng tơmeăm khoăng tê mơdró. Pakĭng mê, xing xoăng ăm tŭm kơxô̆ liăn mơ’no pêi cheăng, ƀă hên troăng pêi ki rơkê, châ tơƀrê, tơtro ƀă rêm hneăng mơnhông mơdêk inhên, Agribank kum kuăn pơlê, ki rơhêng vâ tối cho kơpong hơngế hơngo châ mung tâ ƀă kơxô̆ liăn ki kal păng ‘nâng, mơdêk tơdroăng rêh ối ƀă mơnhông mơjiâng tơmeăm khoăng, tê mơdró, kum thăm mơdât tơdroăng ăm mung liăn xo liăn tơkâ hên.

Hdrối mâu troăng prôk nếo dêi tơdroăng pêi chiâk deăng tối krê ƀă tơdroăng cheăng kâ tơnêi têa tối tơdjuôm, mơhé trâm hên pá puât, pơloăng mơnúa, khu râ kăn pơkuâ Agribank mơnhên, hngêi arak liăn krá chân pơkâ pêi troh mơnhông mơdêk chiâk deăng – kuăn pơlê pêi chiâk – rêh ối thôn pơlê, đi đo mơ-eăm tơdjuôm ivá rơtế Chin phuh, Hngêi arak liăn kum tung pêi chiâk deăng, pơtối mơjiâng mâu tơdroăng tơtêk ki nếo tung tơdroăng rak ngăn tơdroăng rêh ối kuăn pơlê, ki rơhêng vâ tối cho kuăn pơlê pêi chiâk deăng ƀă mơnhông mơdêk pêi chiâk deăng, tíu kuăn pơlê rêh ối kơnôm to pêi chiâk deăng tơnêi têa pin tung rơxông nếo.

Tung troăng pêi ton xŏn mơnhông mơdêk dêi tơná, mâu pơkâ kân đi đo châ Agribank mơnhên kơjo má môi mê cho: Djâ troăng ahdrối pêi pro mâu troăng pơkâ pêi, troăng hơlâ dêi Đảng, Tơnêi têa; Pơtối rak hnoăng ki xiâm tung tíu mơdró ‘na liăn ngân ăm kuăn pơlê pêi chiâk deăng, đi đo cho ngế pú hmâ rơtế prôk môi hiâm mơno, loi tơngah dêi kuăn pơlê pêi chiâk deăng, kơpong kuăn pơlê rêh ối kơnôm to pêi chiâk deăng.

Đi đo po rơdâ ‘na tíu pêi cheăng, mâu hngêi arak liăn Agribank ki rơhêng vâ tối troh a mâu kơpong hơngế hơngo, mâu kơpong pêi chiâk deăng, tíu kuăn pơlê rêh ối kơnôm to pêi chiâk deăng dêi lâp tơnêi têa vâ pêi teăm tơdrêng tơdroăng kal vâ mung liăn ƀă xúa mâu tơdroăng pêi cheăng dêi hngêi arak liăn dêi kuăn pơlê tung lâp tơnêi têa ƀă hía hé.

Pêi tiô hnê mơhno dêi Chin phuh ƀă Hngêi arak liăn kum tung pêi chiâk deăng, Agribank đi đo séa ngăn tơdroăng, tơdroăng pơreăng xông tâ tú, kong prâi pro ôh tá tơniăn. Tơdrêng amê pêi pro pơxúa, châ tơƀrê mâu troăng tŏng kum kuăn pơlê ki tơdjâk xua pơreăng COVID-19, kong prâi pro ôh tá tơniăn, tro lŭp tơmeăm khoăng ôh tá ai ivá vâ hbrâ mơdât tơdjâk troh pêi chiâk deăng...

Pakĭng mê, Agribank kô pơtối pro tơ’lêi hlâu ăm kuăn pơlê tro tơdjâk trâm pá puât tung pêt mơjiâng tơmeăm, tê mơdró, ki rơhêng vâ tối cho khu tê mơdró krâ kơvâ ƀă kŭn, khu tê mơdró ối tung mâu kơvâ tơdjâk râ ó xua pơreăng COVID-19 ƀă khu tê mơdró ai tíu cheăng pơkuâ tro lĕm, ai ivá mơnhông tung pêt mơjiâng tơmeăm khoăng, tê mơdró tơniăn lĕm; đi đo hbrâ, đi đo séa ngăn vâ ai troăng pêi ki tơtro ƀă rêm ngế kuăn pơlê drêng trâm pêi cheăng.

A Sa Ly tơplôu ƀă tơbleăng