Ô pôa, Dak Lak dế cho kong pơlê ai ki xâp kong iâ má môi Tây Nguyên ƀă iâ má môi tâng vâ pơchông ƀă lâp tơnêi têa. Mê hôm cho xua tơdroăng pêi rak ngăn kong hâi tơmâng khât há?

Pôa Nguyễn Quốc Hưng: Dak Lak loăng vâ ăm xâp iâ xua mâu ƀăng tơnêi tơbăng lĕm dêi Dak Lak kân má môi Tây Nguyên. Tá tơnêi a tơring Ea Súp ôh ta xê tơnêi khêi bazan, la tơbăng ƀă pêi klâng chiâk tơ’lêi. Pakĭng mê, kuăn pơlê mot lăm rêh ối hmâng vâ ki hên mot rêh ối a Dak Lak, nôkố vâi dế trâm pá. Vâ rêh ối thế ai tơnêi, vâ ai tơnêi thế ko kong . Ki má péa nếo, cho xiâm kong ki pêt nôkố tơnêi tê a’no liăn pêi vâ tối ôh tá ai. Bú ai liăn pêt kong a tơbăng kong tiô ƀăng tơnêi ki hơ’lêh tơdroăng xúa pêi, tơnêi ki kố vâ tối iâ tê.

Tơnêi têa ’no liăn pêt kong ôh tá ai, mâu tơdroăng tơkêa ODA xuân ôh ti ai, ‘no liăn pêt kong ing liăn FDI xuân ôh tá ai. Vâ mơnhông pêt kong pá khât.

-Dak Lak ai chât to Kong ti pêi chiâk deăng pêt kong, rak ngăn tơnêi kân rơdâ (vâ chê 220 rơpâu ha) tơdroăng vâ mơnhông pêt kong ti lâi ô pôa?

Pôa Nguyễn Quốc Hưng: Pêt kong nôkố bú kơnôm a mâu Kong ti rak ngăn kong ƀă mâu kuăn pơlê la mâu luât pơkâ tŏng kum prôk tiô tơdrêng. Mâu tíu rak ngăn kong nôkố liăn pêi cheăng ôh tá ai, ôh tá chiâng vâ mơnhông pêt kong.

-Tung pơla hên tơdroăng xơpá tiah nôkố, Dak Lak tơkâ luâ xơpá tiah lâi vâ châ tơƀrê tung to lâi hơnăm achê kố, ô pôa?

Pôa Nguyễn Quốc Hưng: Vi ƀan Kuăn pơlê dêi kong pơlê Dak Lak hiăng ai Pơkâ 1237 hâi lơ 24/5/2021 ‘na tơdroăng pêt kong ƀă pêt loăng drêh pơla hơnăm 2021-2025 ai 7.268 ha. Troh nôkố nếo khế 9/2024 hiăng pêt châ 12.582 ha. Hơnăm 2024 kố, xuân pêt luâ pơkâ, mơni kô pêt châ dâng 2.500 - 3.000 ha tâng vâ pơchông ƀă pơkâ 1.871 ha. Kố nếo cho pêt kong, ối pêt loăng tơprâ tơprŭng cho rêm hơnăm pêt châ 200.000 xiâm. Rêm hơnăm ngin xuân pêt châ luâ pơkâ.

-Tơnêi kong tro ko ‘nhiê, tro hdi xo hdrối nah hên (mê cho Dak Lak riân ai dâng 128.000 ha ), kong pơlê hôm ai troăng hơlâ ‘mâi mơnhông nếo ƀăng tơnêi kong, ô pôa?

Pôa Nguyễn Quốc Hưng: 128.000ha  kố cho hiăng ton sap nah, dâng 20 hơnăm kô, ôh tá xê nếo, ngin ôh tá chiâng vâ ‘mâi mơnhông. Tâng pin hmếo pơ kơnhêng rak tơnêi kong la tung pơla kuăn pơlê kơklêa ôh tá lĭng pêi. Ngin kô ngăn nếo, pơkâ nếo tơnêi ki ai kong mê. Ngăn a pơkâ dêi kong pơlê hiăng châ Chin phuh kĭ ƀă pơkâ peăng tơnêi dêi tơring, ing mê pơkâ xoăng tơnêi pêi kâ, tơnêi pro hngêi ối ăm kuăn pơlê. Mâu tơnêi ki lâi hiăng pơkâ tơnêi kong, ai kong mê ngin thế pơkâ rak ngăn kong. Tơnêi kong hía mê kô pêt kong, pêt kong vâ xo loăng, pêt kong loăng kân, pêt kong tơkŭm hlối pêi chiâk.

Tơdroăng pơkâ 23 hơnăm 2022 dêi khu xiâm kal kí ‘na troăng hơlâ mơnhông kơpong Tây Nguyên pơkâ thế mơdêk ki xâp dêi kong tung kơpong,  tơmâng khât troh ‘mâi mơnhông ƀă pêt kong. Dak Lak hiăng ai troăng hơlâ ti lâi vâ pêi tơdroăng mê, ô pôa?

Pôa Nguyễn Quốc Hưng: Tung pơla nôkố xơpá khât mơhnhôk tăng liăn vâ pêt kong, laga, ngin thế xúa ƀă ai pơkâ troăng hơlâ ăm kŏng ti rak ngăn kong xuân môi tiah mâu khu pêi cheăng tơrŭm ƀă kuăn pơlê mơdêk hnoăng cheăng pêt kong. Ngin dế mơdêk ăm mâu khu mơdró tăng ‘no liăn veăng kum kuăn pơlê pro  pro Chư̆ng chih kong FSC (Chư̆ng chih kong krá kak - PV). Ƀă drêng kong ai chưng chih tiah mê kuăn pơlê kô xúa, lơ khu mơdró pêt kong kô xúa ai pơxúa tâ, yă tê kô hên tâ ki iâ gá 10%.

Pakĭng mê, ‘na tơdroăng pro hlá mơ-éa, ngin xuân kơjo kum tâi ivá vâ pro tơ’lêi hlâu ăm mâu khu mơdró, kuăn pơlê pêt kong.

Tơdroăng pơkâ 58 dêi Chin phuh nếo pơkâ khế 5/2024 xuân hiăng ai mâu luât pơkâ tŏng gum. Ngin dế mơjiâng pơkâ ƀă hnê mâu khu mơdró, mâu hiăng kân pro ti lâi mơjiâng tơdroăng tơkêa pro, mâu troăng hơlâ vâ tơnêi têa veăng kum tro tiô pơkâ ki nếo.

-Mơnê kơ pôa Nguyễn Quốc Hưng, Ngế pơkuâ rak ngăn loăng kong dêi kong pơlê Dak Lak!