VOV4.Xơ Đăng - Pơreăng châi klêa chu châu Phi pơtối vêh tâ tú nếo a kong pơlê Dak Lak, ƀă vâ chê 60 tíu ai pơreăng châ hlo sap ing a poăng hơnăm troh nôkố. Péa tíu ki ai pơreăng ki nếo a Dak Lak pơrá dêi rơpŏng mâu ngế ki păn, a cheăm Ea Tul prế Čư̆ Mgar, kong pơlê Dak Lak ƀă 10 to chu tro tâ pơreăng.

Mâu ngế ki păn chu a Dak Lak xôh pơkeăng kơdê pơreăng a kơdroăng chu ki tro tâ pơreăng

Kơxô̆ chu tâ pơreăng hiăng châ khu ki pơlât mơnăn tơrŭm ƀă kuăn pơlê tâp kơđu prâu tah. Riân sap ing apoăng hơnăm troh nôkố, lâp kong pơlê Dak Lak ai 59 tíu ki ai pơreăng a 52 to thôn, pơlê, dêi 8 tơring. Tâi tâng kơxô̆ chu tâ pơreăng va chê 400 to ƀă ki hngăm vâ chê 24 tâ̆n.

Tung mê, Čư̆ Mgar xuân cho môi tung mau tơring ki ai pơreăng châi klêa chu ôh tá tơniăn má môi ƀă 158 to athế prâu tah, tâi tâng ki hngăm vâ chê 11 tâ̆n. Pôa Nguyễn Quang Đức, ngế ki pơkuâ Tíu Păn ƀă pơlât mơnăn tơring Čư̆ Mgar, ăm ‘nâi: Nôkố, kơvâ pơlât mơnăn tơrŭm ƀă khu pơkuâ tơring séa ngăn tíu ki ai pơreăng ƀă pơkâ thế mâu ngế ki păn tơhrâ pôi tá tê chu ki tro pơreăng mê ah chiâng pro pơreăng tâ tú rơdâ.

Katarina Nga tơplôu ƀă tơbleăng