VOV4.Xơ Đăng - A pơlê kong kơdrâm Ƀuôn Ma Thuột, Khu pơkuâ kuăn pơlê pêi chiâk deăng kong pơlê Dak Lak tơkŭm po pơxiâm po Măng tĭng leh tơbleăng, tê tơmeăm pêi lo ing chiâk deăng ki má môi kong pơlê Dak Lak hơnăm 2022 ƀă mơhnhôk tơdroăng tơ’noăng ‘’Kuăn pơlê pêi chiâk deăng pêt mơjiâng tơmeăm, tê mơdró tơmeăm pêi lo ing chiâk deăng, tơmeăm tơniăn ƀă rak vế kong prâi’’.

Pôe ché pơxiâm po tơdroăng

Tơkŭm po sap ing kố troh tâi hâi lơ 13/7 la ngiâ, tơdroăng Măng tĭng leh tê tơmeăm khoăng pêi lo ing chiâk deăng ki má môi kong pơlê Dak Lak hơnăm 2022 klâ chiâng 2 râ, tung mê: sap hâi lơ 7 – 9/7 tơkŭm tơbleăng, tê tơmeăm pêi lo ing chiâk deăng dêi kong pơlê ƀă tơmeăm kum tung pêi chiâk deăng kơmăi kơmok rơxông nếo, pêi chiâk deăng hưh cơ.

Sap ing hâi lơ 10 – 13/7, râ tơring tơkŭm po mâu tơdroăng tơbleăng, tê tơmeăm pêi lo ing chiâk deăng dêi kong pơlê. Tơdroăng hơnăm kố ai 60 tơmeăm dêi Khu pơkuâ kuăn pơlê pêi chiâk deăng mâu tơring, pơlê krâm, pơlê kong kơdrâm tung kong pơlê Dak Lak ƀă mâu kong pơlê Gia Lai, Kon Tum, Dak Nông, Lâm Đồng, An Giang, Đà Nẵng veăng.

A Sa Ly tơplôu ƀă tơbleăng