-Ô pôa, veăng kum ăm kuăn pơlê ƀă khu mơdró lăm tăng rôe, mơ’no tê plâi sầu riêng, khu kăn pơkuâ hiăng pơkâ pêi pro môi tiah lâi?

Pôa Trần Hồng Tiến: Khu kăn pơkluâ hnê ngăn cheăng Đảng tơring hiăng hnê tối pơkâ thế krí xo plâi sầu riêng a hơnăm kố. Dế nôkố, Vi ƀan hnê ngăn tơring hiăng mơjiâng mâu khu râ thăm mơdêk hnoăng cheăng lăm gak ngăn; mâu khu râ ki ai hnoăng cheăng, môi tiah kŏng an, khu ngăn ‘na chiâk deăng... thăm mơdêk hnoăng cheăng kring vế tơniăn ăm tơdroăng pêi cheăng ƀă mơ’no liăn ngân, kuăn mơngế vâ rơnáu mâu tơdroăng ki vâ krí plâi sầu riêng hơnăm kố, châ rak tơniăn, ôh ta ăm ai tơdroăng ki khu ngế lo lăm ko ‘nhiê, tong krí plâi sầu riêng dế ối kơbâng, ah pro tơdjâk troh tơmeăm, pro ‘mêi tuăn mơno kuăn pơlê.

-Mot tung rơnó krí plâi sầu riêng, Krông Pač kô tơdah hên mơngế pêi cheăng a mâu tíu ki ê troh, xua mê, tơdroăng ki pơkuâ ngăn ‘na pơ’leăng mâ mơngế, kring vế tơniăn tơdroăng rêh ối a tơring kố châ hbrâ pêi pro môi tiah lâi, ô pôa?

Pôa Trần Hồng Tiến: Ngin hiăng hnê djâ môi Tôh ki pêi hnoăng cheăng lăm troh a mâu kơpong chiâk deăng ki ai pêt hên plâi sầu riêng ki kân dêi tơring, thăm mơdêk tơdroăng pơkuâ ngăn ƀă mơngế pêi cheăng ki lo ing mâu kong pơlê ki ê troh akố, gak ngăn, kring vế tơniăn ăm tơdroăng rêh kâ ối, mơngế pêi cheăng, tơdroăng ki gum tăng cheăng pêi a tơring ki kố. Hnê tối ăm khu tôh ki tơrŭm cheăng ai todjâk thăm pêi pro krâu khât tơdroăng lăm tí tăng ngăn, mơnhên vâ ‘nâi, hnê mâu khu mơdró kâ kĭ tơkêa drêng tăng mơngế veăng krí, mơngế pêi cheăng, mơngế ki troh rôe plâi sầu riêng, kĭ tơkêa rôe plâi dêi mâu rơpŏng hngêi, khu ngăn pêi cheăng tơrŭm athế pêi pro tro tiô tơdroăng pơkâ dêi luât, vâ hbrâ ví tơdroăng ing peăng rôe-ing peăng tê ôh tá vâ rak tro tiô tơdroăng hiăng tơkêa dêi pó.

-Troăng kân kơxô̆ 26 tơkâ luâ tơring Krông Pač hâ ho, tiô tối hdrối pá vâ ăm rơxế chơ plâi sầu riêng kơtâu lối hên hĕng tung rơnó kuăn pơlê krí tê dêi plâi. Vâ pôi ta hâ ho rơxế kơtâu drô troăng, mê mâu kong pơlê hiăng ai troăng hơlâ hnê tối, pêi pro tiah lâi, ô pôa?

Pôa Trần Hồng Tiến: Ngin hiăng pơcháu hnoăng cheăng ăm Kŏng an, Ƀơrô ngăn ‘na Pêi cheăng kâ - Mơjiâng troăng prôk mơjiâng mâu túa ki klâ xing xoăng troăng prôk, tơdroăng rah xo mâu kơpong vâ xing xoăng ăm mâu rơxế chơ container kơtâu troh, prôk lăm, tot, pơtê, la ki kal, ôh ta ăm rơxế kơtâu, tot hmâng to lo vâ a mâu kĭng troăng, a hâng lông troăng ƀă mâu tíu ki ôh ta tro tơdroăng, pro tơdjâk troh tơdroăng prôk lăm dêi kuăn pơlê ƀă mâu rơxế ki ê. Dế nôkố, ngin hiăng lăm ngăn, rah xo mâu kơpong plông ki kân, môi tiah plông tơ’noăng ivá, plông ki ăm rơxế tot dêi mâu Kŏng ti vâ gum ăm mâu khu pơkuâ ngăn ‘na rơxế chiâng ăm phep rơxế tot ối, tơkôm pơto chơ kế tơmeăm, gum ăm tơdroăng ki tê-rôe plâi sầu riêng dêi kuăn pơlê.

Vâ mơnhông krá tơniăn kơvâ ngăn ‘na tê rôe plâi sầu riêng, tơdroăng ki rak vế ngăn ki dâi lĕm drêng krí plâi cho tơdroăng ki kal. Tơdroăng kố châ pêi pro tiah lâi, ô pôa?

Pôa Trần Hồng Tiến: Vâ tơniăn ăm tơdroăng pêi pêt plâi sầu riêng, gum tơdroăng krí, chôu ‘măn, tâ tung kơthung, kơxâk, tê-rê, pơto chơ plâi sầu riêng tơniăn, ngin hiăng hnê tối tâi tâng khu râ pơkuâ thăm pêi pro kơtăng khât tơdroăng hnê tối, pơtâng khĕn, mơhnhôk kuăn pơlê drêng krí, tê plâi, athế tơkôm plâi i tum khât ‘nôi, rak tơniăn ki dâi lĕm dêi plâi, rak ki dâi lĕm ăm inâi Sầu riêng Krông Pač, ƀă athế pêi pro ti lâi vâ rak tơdroăng pêi pêt-rak ngăn-tê mơdró, inâi dêi plâi ki dâi păng ‘nâng, tơtro ƀă khu mơdró kâ.

-Hôm, mơnê kơ pôa!