VOV4.Xơ Đăng - Hâi lơ 16/9, Khu ngăn ‘na kuăn pơlê pêi chiâk Dak Lak hiăng tơkŭm po hneăng tơpui tơno “Kuăn pơlê pơxiâm mơjiâng tơdroăng cheăng pêi rơkê plĕng tung hneăng ki kơmăi kơmok hơ’lêh nếo kơnôm ing mâu tơmeăm khoăng ki châ mơjiâng lo ing OCOP”. Troh nôkố, kong pơlê Dak Lak hiăng ai 72 tơmeăm khoăng châ mơnhên tối cho tơmeăm OCOP ki châ sap ing 3-4 hơlŏng, ối tung mâu tơmeăm khoăng chiâk deăng ki hiăng hmâ ai ing tơmeăm ki chiâng xêh, ƀă tơdroăng pêi mơjiâng chiâng ing mâu chiâk deăng, mê cho mâu tơmeăm ki hmâ pêi lo dêi kong pơlê kố, môi tiah kơphế, tiu, ƀơr, plâi sầu riêng.

Tâ tá hneăng hôp

A roh hôp kố, mâu kăn hiăng tơkŭm tơpui tơno mâu tơdroăng ki ai tơdjâk troh tơdroăng vêh mơnhên mâu tơmeăm khoăng pêi lo ing chiâk deăng hnối ai tá tơdroăng ki hmâ pêi pro rêm hâi dêi kong pơlê. Tơdrêng amê tí tăng troăng hơlâ vâ po rơdâ kơchơ, thăm mơdêk inâi kế tơmeăm dêi rêm khu râ ki cheăng vâ pêi mơjiâng tơmeăm OCOP.

Mâu kăn xuân hiăng pói tơngah tiah kố, hơ’lêh kơxô̆ cheăng kơmăi kơmok tung pêi chiâk deăng cho kal kân khât, kum po troăng hơlâ ƀă xúa kuăn mơngế, liăn ngân, kế tơmeăm châ tơtro tâ; kum pêi lo hên kế tơmeăm, dâi lĕm, tơƀrê tung pêi cheăng kâ, tê mơdró, tơdrêng amê hnối mơjiâng ing troăng pêi pêt, rak ngăn, tê mơ’no, ‘măn chôu tơniăn tro tiô khoa hok, krá tơniăn ton.

Nhat Lisa tơplôu ƀă tơbleăng