VOV4.Xơ Đăng - Tơnêi têa pin cho tơnêi têa ki pêi mơjiâng hên kế tơmeăm kơnôm ing chiâk deăng, thăm nếo, rêm kơpong pơrá ai xêh mâu tơmeăm ki pơrá phá, xua ti mê, tơnêi têa pin cho tơ’lêi khât tung tơdroăng ki vâ tê mơdró ăm kong têa ê. Laga, vâ mâu tơmeăm ki pêi lo ing chiâk deăng châ tơniăn, krá ton mê pơkâ thế mâu ngế pêi chiâk deăng, khu pơkuâ ngăn ‘na pêi cheăng tơrŭm, khu mơdró kâ athế châ hriâm, hlê plĕng hên mâu tơdroăng ki tê mơdró kế tơmeăm ƀă kơmăi chal nếo, mơdró kâ tiô kơ kơmăi điê̆n tưh.

Pêt mơjiâng, tê ngi kong têa ê tơmeăm pêi lo ing chiâk deăng mâu hơnăm achê kố đi đo châ tê hên. Pơtối mê, tung pơla kố nah, tơdroăng têa kơdruâ oăng Việt Nam tê ngi kong têa ê đi đo troh a EU, Mih; plâi nong Sơn La tê ngi kong têa ê châ tơƀrê, tê a mâu kong têa ki pro kơtăng môi tiah Ăng-glê, Australia; plâi sầu riêng Dak Lak tê ngi kong têa ê tiô troăng tê hên ngi kong têa Sinuâ, plâi treăng tríLục Ngạn, Bắc Giang châ kheăn kơdeăn păng ‘nâng a kong têa Nhuk, Pơhlăng ƀă hía hé ăm hlo mâu troăng hơlâ mơjiâng, mơnhông mơdêk inâi, mơhnhôk tê ƀă ki rơhêng vâ tối cho tơdroăng tơbleăng kơchơ rôe ăm kuăn pơlê pêi chiâk deăng dế mơnhông mơdêk châ tơƀrê păng ‘nâng.

Laga mâu tơdroăng châ tơƀrê kố pơtối tá hâi rơtế ƀă tơdroăng mơnhông mơdêk kơchơ mơdró krá tơniăn, xua tơdroăng ki păng ‘nâng pá puât drêng vâ châ achê tơmeăm pêi lo ing chiâk deăng, tơmeăm mâu kơpong xua kơmăi kơmok uâ pro ối iâ, pro pá ăm tê, xua hâi khế rak lĕm iâ, Rơtế ƀă mê, tơdroăng châ achê djâ tơmeăm pêi lo ing chiâk deăng to a tíu tê mơdró điê̆n tưh ôh tá tơ’lêi hlâu, xua hlê plĕng dêi khu tê mơdró ƀă troăng tê mơdró kố tá hâi hên.

Tơmeăm pêi lo ing chiâk deăng dêi Việt Nam hên tơmeăm păng ‘nâng

Jâ Đinh Tuyết Nhung, kăn hnê ngăn Khu tơrŭm pêi chiâk deăng pêt pơkeăng ƀă pơlê pơla Bắc Kạn tối tơdroăng ki ai khât:

‘’Tơmeăm pêi lo ing chiâk deăng ai hâi khế rak ‘măn lĕm iâ, ƀă tíu cheăng tá hâi ai um méa xuân môi tiah troăng pêi ton xŏn tê mơdró vâ ai môi troăng pêi inhên châ achê mơngế ki rôe xua mê tê mơdró tơmeăm tê tung tíu mơdró tá hâi hên. Ngin pói vâ ing peăng khu râ kăn pơkuâ kô ai troăng pêi inhên vâ tŏng kum mâu tíu cheăng mê kô chiâng djâ mâu tơmeăm tê a kơchơ mơdró kân’’.

Kal mơjiâng châ inâi ăm tơmeăm pêi lo ing chiâk deăng

Vâ mơjiâng tíu tê tơniăn ăm mâu tơmeăm pêi lo ing chiâk deăng, kal thế mơjiâng inâi ăm tơmeăm, mơjiâng um méa khu tê mơdró. Laga mê cho tơmâng hên tâ troh kŏng ngê̆ uâ pro tơmeăm pêi lo ing chiâk deăng xuân môi tiah ai mâu troăng hơlâ mơhnhôk khu tê mơdró uâ pro vâ mơdêk ki kơnâ tơmeăm pêi lo ing chiâk deăng.

Teăng mâ tíu tê mơdró điê̆n tưh Posmart.vn – pôa Nghiêm Tuấn Anh, Kŏng ti xiâm Tíu pơtroh kơthô Việt Nam tối ăm ‘nâi, ing kơmăi ki pêi logistics, tíu mơdró điê̆n tưh dêi Tíu pơtroh kơthô Việt Nam, hiăng ai hên tơmeăm plâi sầu riêng tê ngi kong têa Mih, plâi treăng jí tê ngi kong têa Nhuk, Châu Âu ƀă hía hé. Tung pơla mơnhông tê mơdró điê̆n tưh, tơdroăng hbrâ tơdroăng ki rơkê, tơpui kâ a kơchơ mơdró xúa điê̆n tưh ăm kuăn pơlê cho kal khât:

“Pin ai hên plâi kâ ki kơhiâm, dâi lĕm, kô chiâng vâ tê tung mâu kơchơ tung tơnêi têa ƀă lâp plâi tơnêi. Nôkố kuăn pơlê pêi chiâk deăng a kơpong kong ngo, thôn pơlê, kŏng ngê̆ thong tin tá hâi châ mơdêk ƀă mâu kong pơlê, pơlê kong kơdrâm, tíu xiâm. Xua mê, tơdroăng hbrâ ki rơkê pêi cheăng, tơpui kâ ăm kuăn pơlê, ngin ngăn mê cho tơdroăng ki apoăng vâ châ tơƀrê ăm tê mơdró điê̆n tưh.

Xua mê, ngin ôh tá pêi to tơdroăng hnê mơjiâng kuăn pơlê pêi chiâk deăng troăng djâ tơmeăm to a tíu tê mơdró điê̆n tưh, tơbleăng tơmeăm vâi mê hbrâ ăm vâi tâi tâng mâu tơdroăng ki tê mơdró, tơpui kâ tung troăng kơmăi điê̆n tưh’’.

VOV1/Tơplôu: A Sa Ly