Dế nốkô cho dế mot tung pơla tô mơdrăng khăng khoăng, kơvâ pêi chiâk deăng kong pơlê Kon Tum hiăng hbrâ rơnáu mâu túa pơkâ tôh têa ăm mâu hdrê loăng pêt rơnó Xeăng Tô 2022 – 2023. Kong pơlê Kon Tum nôkố ai 178 to long têa xuân dế rak vế tơniăn têa tôh ăm lối 16.600 ha hdrê loăng pêt tŭm túa. Laga, xua ai mâu long têa ki ‘nâ tơdroăng ki xoăng ‘no têa ối tơkôm tung têa troh mê hên tơdroăng mơni kô ôh tá bê têa vâ tôh a mơ’nui rơnó.

Tiô tối hdrối, sap ing nôkố troh mơ’nui rơnó mơdrăng, ai dâng 250ha hdrê loăng pêt kô tro răng hlâ. Vâ kơdroh khât tơdroăng ki ôh tá bê têa tôh a mơ’nui rơnó, kơvâ cheăng ki ai tơdjâk troh hiăng hbrâ rơnáu mâu túa pơkâ hbrâ tôh mâu têa a rơnó tô ăm hdrê loăng pêt môi tiah: tơkŭm kui tah mâu trâp a troăng ki têa hiu ƀă bro phuâng tíu têa hiu vâ ai têa mot tung tíu ki têa hiu; xoăng kơmăi hrik têa mâu hdrê pêt a rơnó mơdrăng khăng khoăng.