VOV4.Xơ Đăng - Pêi pro tiô tơdroăng pơkâ thế dêi Vi ƀan hnê ngăn kong pơlê Kon Tum ‘na tŏng kum mâu ngế ki pêt sâm Ngọc Linh ‘mâi mơnhông mâu tơdroăng ki tro lŭp xua hdrê loăng pêt tro oâ hdrong kâ ‘nhiê, Hngêi rak liăn Tŏng kum rêh ối pơlê pơla kong pơlê Kon Tum dế mơnhên kơlo ki tro lŭp dêi rêm rơpŏng kuăn pơlê vâ ai troăng hơlâ tŏng kum.

Nôkố a péa tơring Tu Mrông ƀă Đak Glei ai 953 rơpŏng kuăn pơlê mung liăn ing hngêi rak liăn vâ pêt sâm Ngọc Linh ƀă tâi tâng kơxô̆ liăn chĕn lối 62 rơtal liăn. Tiô séa ngăn apoăng dêi Hngêi rak liăn, a tơring Tu Mrông kơxô̆ rơpŏng ai sâm Ngọc Linh tro hlâ ai 87 rơpŏng ƀă tâi tâng kơxô̆ liăn chĕn lối 6 rơtal liăn.

Môi xiâm hdrê sâm Ngọc Linh tro oâ hdrong kâ ‘nhiê

A tơring Đăk Glei kơxô̆ rơpŏng ai sâm Ngọc Linh hlâ cho 9 rơpŏng ƀă kơxô̆ liăn chĕn 380 rơtuh. Hngêi rak liăn tŏng kum rêh ối pơlê pơla kong pơlê Kon Tum dế tơrŭm ƀă khu kăn pơkuâ 2 tơring mơnhên ki tro lŭp vâ ai troăng hơlâ tŏng kum ăm mâu rơpŏng kuăn pơlê.

Tiah mê, kô ăm mơdrếo chĕn hrá tơ’nôm hơnăm mung tâng tâi tâng ki tro lŭp mê pá xôp 40%; kơxô̆ liăn chĕn 3 hơnăm ƀă mâu ngế ki ai tâi tâng ki tro lŭp sap ing 40% troh 80%. Hdró chĕn 5 hơnăm mê tâi tâng ki tro lŭp lối 80%.

Katarina Nga tơplôu ƀă tơbleăng