VOV4.Xơ Đăng - A kong pơlê Kon Tum pơreăng xông kâ ‘nhiê a Sâm Ngọc Linh nôkố hiăng kâ ‘nhiê troh lâp lu ƀă tro lŭp hên ‘na liăn ngân, malối ƀă mâu rơpŏng hdroâng kuăn ngo kơtiê, rơpŏng xơpá. Riân ngăn dêi péa tơring Đăk Glei prế Tu Mrông, kong pơlê Kon Tum ăm hlo, troh nôkố hiăng ai dâng 50 rơpâu xiâm Sâm Ngọc Linh tro pơreăng kâ. Tung mê, kơxô̆ xiâm sâm ki tro pơreăng kâ ‘nhiê a tơring Đăk Glei ai lối 10 rơpâu xiâm ƀă tơring Tu Mrông lối 39 rơpâu xiâm.

Kăn pơkuâ hnê ngăn Đảng, Kăn hnê ngăn Hô̆i đong kong pơlê Kon Tum - pôa Dương Văn Trang tối ‘na ki tro lŭp dêi kuăn pơlê drêng Sâm Ngọc Linh tro pơreăng kâ ‘nhiê

Hlo tơdroăng ki pơreăng kâ ‘nhiê a Sâm Ngọc Linh ai lâp lu, pro chiâng lŭp hên ‘na liăn ngân, a Rôh hôp má 8 Khu pơkuâ Đảng ƀô̆ kong pơlê hneăng 16, kăn pơkuâ hnê ngăn Đảng, Kăn hnê ngăn Hô̆i đong kong pơlê Kon Tum cho pôa Dương Văn Trang hiăng tăng tơdroăng cheăng ƀă Khu ngăn chiâk deăng ƀă mơnhông thôn pơlê.

Kuăn pơlê cheăm Tê Xăng, tơring Tu Mrông a kơdrum sâm Ngọc Linh ki tro pơreăng kâ ‘nhiê

Pôa Nguyễn Tấn Liêm, kăn pơkua Khu ngăn chiâk deăng tối tiah kố, tíu pêi cheăng hiăng hbrâ rơnáu tung tơdroăng ki vâ kơdê pơreăng a Sâm Ngọc Linh. ‘Na xiâm kối chiâng pro pơreăng kâ ‘nhiê a Sâm Ngọc Linh, cho kơdrum deăng hiăng ai pơreăng, pakĭng mê, ai mâu xiâm ki ‘nâ hiăng tro pơreăng ƀă ŭm rêi.

Katarina Nga tơplôu ƀă tơbleăng