VOV4.Xơ Đăng - Kơxê lơ 21/7, a pơlê kong kơdrâm Ƀuôn Ma Thuột, kong pơlê Dak Lak, Khu xiâm pơkâ mơdêk tê mơdró tơrŭm ƀă mâu Khu pơkuâ Việt Nam a châu Phi tơkŭm po Rôh tiâ mơnhên ‘no tơdrêng ing troăng hyôh Internet tê kơphế ngi kong têa châu Phi vâ tŏng kum mâu kong pơlê, khu mơdró kâ, khu pêi cheăng tơrŭm dêi Việt Nam tăng kong têa vâ tê, tơdjêp tê mơdró.

Kơphế Việt Nam lôu péa mot tung mâu kơchơ tê mơdró Châu Phi

Tiô tơdroăng ăm ‘nâi sap ing Khu xiâm ngăn cheăng kơmăi kơmok ƀă tê mơdró, Châu Phi cho kong têa ki ai tơdroăng ki rơhêng vâ roê hên ‘na kế tơmeăm ki pro ing kơphế. Rêm hơnăm, Châu Phi roê dâng 750 rơtuh dollars vâ roê kơphế. Tung mê Việt Nam cho 1 tung 5 to kong têa ki tê xiâm. Pakĭng tê pơ’leăng, ai mâu inâi kơphế ki uâ pơliê dêi Việt Nam môi tiah Trung Nguyên, King Coffee xuân châ tơmâng ngăn vâ roê a kơpong kố.

Veăng tung rôh tiâ mơnhên, pôa Lê Văn Vương, kăn pơkuâ kŏng ti pêi cheăng tiô rơnó Vương Thành Công ăm ‘nâi, kố cho rôh tơ’lêi vâ khu mơdró kâ tơmâng tối sap ing mâu khu ki rơkê, ing mê, ví mâu tơdroăng ki ôh tá mơhúa ki trâm drêng tê kơphế ngi mâu kong têa châu Phi.

Katarina Nga tơplôu ƀă tơbleăng