VOV4.Xơ Đăng - Klêi kơ’nâi 16 pêi pro Pơkâ Tơnêi têa 7, hneăng 10 ‘na pêi chiâk deăng, kuăn pơlê pêi chiâk deăng, thôn pơlê tơnêi têa pin hiăng châ hên tơdroăng ki tơƀrê ki kal, ai pơxúa kân, tâi tâng. Mơjiâng pro, tê mơdró kế tơmeăm pêi lo ing chiâk deăng hlo hơ’lêh rơdêi tiô troăng mơdêk dâi lĕm ƀă kơnía, hmâ ƀă tơdroăng kong prâi pro hơ’lêh. Laga, tơdroăng ki tơbleăng pêi pro Pơkâ tung pơla hdrối nah xuân ối mơhno tối hên tơdroăng ki tá hâi klêi, tá hâi tơniăn. A Rôh hôp dêi Tơnêi têa 5 Khu pơkuâ ngăn Tíu xiâm Đảng hiăng tơpui ‘na Tơdroăng pơkâ mơgêi 15 hơnăm pêi pro Pơkâ Rôh hôp Tơnêi têa 7 hneăng 10 ‘na pêi chiâk deăng, kuăn pơlê pêi chiâk deăng, thôn pơlê. Tiah mê, tơdroăng ki hriăn ngăn, xúa khoa hok – kong ngê̆, hơ’lêh nếo, mâu ngế cheăng rơkê tá hâi chiâng ivá xiâm vâ pơ’lêh mơnhông, tơdroăng kố pâ thế kal pơkâ tơdroăng ki nếo vâ pơtối tối nhên hnoăng cheăng ki kal dêi pêi chiâk deăng, kuăn pơlê pêi chiâk deăng, thôn pơlê ƀă hnoăng cheăng mơnhông tơnêi têa.

Pơtối tối nhên tíu cheăng, hnoăng cheăng ki kal dêi pêi chiâk deăng, kuăn pơlê pêi chiâk deăng, thôn pơlê ƀă mơnhông mơdêk tơnêi têa, Pơkâ Hneăng hôp Đảng lâp tơnêi têa roh má 13 tối nhên: Thăm mơnhông pơ’lêh pêi chiâk deăng, mơnhông mơdêk cheăng kâ – thôn pơlê ƀă hlối mơjiâng thôn pơlê nếo. Mơnhông mơdêk pêi chiâk deăng pêt mơjiâng tơmeăm tê mơdró tơkŭm pêi kân tiô troăng rơxông nếo, xúa kŏng nghê̆ rơxông nếo, mơdêk ki kơnâ ki tâk tơ’nôm ƀă mơnhông mơdêk krá tơniăn.

Mơhnhôk mơnhông mơdêk pêi chiâk deăng krúa lĕm ‘na kong prâi, pêi chiâk deăng krúa le\m, pêi chiâk deăng hưh cơ, pêi chiâk deăng xúa kơmăi kơmok rơxông nếo, rơkê, pêi chiâk deăng xúa kơmăi kơmok, kâi trâng ƀă kong prâi hơ’lêh. Pơtối pêi pro Tơdroăng pơkâ xiâm tơnêi têa mơjiâng thôn pơlê nếo tiô troăng hlối mơnhông tíu kơdrâm kuăn pơlê rêh ối tê mơdró, pêi trâu hơngế, châ tơƀrê, krá tơniăn. Pêi pro mơjiâng thôn pơlê nếo tâk tơ’nôm tâ hdrối, thôn pơlê nếo tiô pơkâ ƀă mơjiâng thôn pơlê nếo râ thôn, pơlê.

Mơjiâng troăng hơlâ tơniăn bê kế kâ tơnêi têa tung rơxông nếo. Chôa ‘lâng pro kơdroh ki kơtăn ‘na châ xúa khôi túa lĕm tro pơla pơlê kong kân ƀă thôn pơlê, pơla mâu kơpong ƀă mâu râ pơlê pơla ƀă hía hé.

Tối phiu ro drêng Hneăng hôp Tơnêi têa 5 roh kố tơpui ‘na mâu tơdroăng ki kal dêi tơnêi têa tung mê tơdjâk troh kơvâ pêi chiâk deăng, kuăn pơlê pêi chiâk deăng, thôn pơlê, pôa Nguyễn Trí Ngọc, Kăn phŏ hnê ngăn Khu pơkuâ pêi chiâk deăng ƀă mơnhông mơdêk thôn pơlê Việt Nam tối:

‘’Ngin pói vâ Pơkâ nếo mơhno tơdroăng ki khŏm mơ-eăm dêi tâi tâng khu cheăng kal kí ƀă tơdroăng pêi chiâk deăng, kuăn pơlê pêi chiâk deăng, thôn pơlê. Vâ pơkâ nếo kô chiâng pêi pro, ngin tơmiât thế ai mâu troăng pêi ki tơƀrê má môi. Krê ‘na kơvâ pêi chiâk deăng tối tơdjuôm, kơvâ pêt tơmeăm tối krê ngin hlo thế ai tơƀrê má môi ‘na pêi kêi đeăng luât tơnêi tơníu xua pơkâ pêi ‘na tơnêi ai kơnâ pơkâ ƀă tơdroăng mơnhông mơdêk pêi chiâk deăng, ki rơhêng vâ tối cho mơnhông pêi chiâk deăng, tơmeăm khoăng drêng pin pơ’lêh troăng tơmiât ing pêt mơjiâng tơmeăm pêi lo ing chiâk deăng troh tơmiât cheăng kâ pêi chiâk deăng’’.

Tâi tâng a Roh hôp Tơnêi têa 5 hneăng má XIII

Mơnhên pêi chiâk deăng đi đo cho ‘’trăng ki tơrâng’’ dêi tơdroăng cheăng kâ, drêng mâu tơdroăng châ tơƀrê tung kơvâ pêi chiâk deăng, kuăn pơlê pêi chiâk deăng, thôn pơlê hiăng kum kal khât tung mâu tơdroăng châ tơƀrê kân, ai kơnâ tơdroăng mơdêk dêi tơdroăng pơ’lêh nếo tung pơla kố nah, pôa Lê Minh Hoan, Ngế xiâm pơkuâ ‘na pêi chiâk deăng ƀă mơnhông thôn pơlê tối, tung pơla tơdroăng nếo tung tơnêi têa ƀă lâp plâi tơnêi ai hên pơ’lêh kân, hnoăng cheăng mơjiâng ƀă gak kring tơnêi têa tung rơxông nếo pơkâ mơdêk tơdroăng ki châ tơƀrê tung pêi pro hnoăng cheăng mơnhông mơdêk thôn pơlê, kuăn pơlê pêi chiâk deăng, tíu rêh ối kơnôm to pêi chiâk deăng.

Pơreăng kân COVID-19 pơla kố nah cho mơnhên tơdroăng ki ƀeăn ƀĕng ƀă hbrâ dêi kơvâ tung rơxông nếo. Xua mê, vâ tơniăn châ pơkâ mơnhông mơdêk krá tơniăn, tơdroăng pơ’lêh troăng pêi tơtêk pêi chiâk deăng nếo chiâng môi pơlâ ki thâ ƀă kal khât:

‘’Vâ pro tơdroăng ki pơ’lêh nếo djâ ton xŏn ƀă krá tơniăn cho kal mâu ngế rơkê nếo, mâu troăng tơmiât rơkê mâu troăng pêi tiô troăng tơmiât pêi lâp plâi tơnêi, pêi cheăng a kong pơlê. Troăng tơmiât pêi rơkê kô chiâng ing 1 ngế laga vâ po rơdâ pêi pro ƀă châ khât kal tơdroăng tơdjuôm ivá môi hiâm mơno dêi hên ngế rơtế kum dêi pó pêi châ tơdroăng pơkâ. Tung tơdroăng pơ’lêh dêi tơná tơtro, ƀeăn ƀĕng kơvâ pêi chiâk deăng ôh tá chiâng bu ai 1 ngế tê mê kal ai tơdroăng ki veăng kum dêi pó, tŏng kum dêi mâu khu xiâm, kơvâ cheăng Tơnêi têa ƀă kong pơlê, dêi mâu khu tơrŭm cheăng, ngế krê mâu khu tơrŭm cheăng tung tơnêi têa ƀă kong têa ê’’.

Tiô pôa Lương Quốc Đoàn, Kăn hnê ngăn Khu xiâm pơkuâ kuăn pơlê pêi chiâk deăng Việt Nam, vâ kuăn pơlê pêi chiâk deăng pơ’lêh troăng tơmiât pêt mơjiâng tơmeăm pêi lo ing chiâk deăng pơ’lêh cheăng kâ pêi chiâk deăng mâu râ kal hbrâ ăm kuăn pơlê pêi chiâk deăng ai tŭm tơdroăng vâ pơ’lêh. Ôh tá chiâng pơkâ kuăn pơlê pêi chiâk deăng cho pơ’lêh tơdrêng hlối tâng xuân ối tơmiât tiô ton ƀă troăng pêi ki ton, pôa Lương Quốc Đoàn tối:

‘’Vâ kuăn pơlê pêi chiâk deăng pơ’lêh troăng tơmiât kal thăm pêi pro ‘’tơdroăng kal vâ pơ’lêh nếo’’ dêi kuăn pơlê pêi chiâk deăng. Kal hbrâ ăm kuăn pơlê pêi chiâk deăng ai tŭm tơdroăng ki hlê plĕng vâ pơ’lêh ôh tá chiâng tối kuăn pơlê pêi chiâk deăng pơ’lêh cho pơ’lêh tơdrêng hlối tâng ối tơmiât tiô ton, troăng pêi ki ton mê cho pá vâ mơnhông mơdêk, châ tơƀrê má môi.

Tiah mê, mâu khu râ thế tơrŭm krá tơniăn ƀă mâu khu xiâm, mâu kơvâ, mâu khu tơrŭm cheăng, mâu khu tê mơdró, mâu khu cheăng vâ xúa mâu tơdroăng ki rơkê khoa hok; mơhnhôk mâu khu râ hnê mơjiâng, hnê tơ’nôm, hbrâ ăm mâu ngế tơrŭm pêi chiâk deăng hlê plĕng hên troăng pêi, ai ivá vâ pơkuâ ƀă mơnhông mơdêk hnoăng pơkuâ. Drêng kuăn pơlê hlê plĕng hnoăng dêi tơná ƀă mơnhông hnoăng mê pêi chiâk deăng, kuăn pơlê pêi chiâk deăng, thôn pơlê kô mơnhông mơdêk./.

VOV chêh

A Sa Ly tơplôu ƀă tơbleăng