Klêi kơ’nâi mâu hâi thăm pâk tơ’mot têa, pơkeăng tŭm tiô hnê mơhno dêi thái pơlât mơnăn, khu ro dêi rơpŏng pôa Nguyễn Đình Sơn, ối a thôn Bồng Lai, cheăm Hiệp Thạnh, tơring Đức Trọng hiăng chôa ‘lâng prêi lĕm. Pakĭng 2 to ro tro pơreăng râ hiăng hlâ, lối chât to ro ki ê tung khu ro hiăng chiâng rêi nhâ. Laga, tơdroăng ki pôa Nguyễn Đình Sơn tô tuăn má môi cho ro tơ’lêi vêh tro tâ pơreăng.

“Pâk vaccine hâi lơ 25/7, troh hâi lơ 2/8 mê tơdroăng ki ôh tá vâ kâ, troh hâi lơ 4/8 mê tâi tâng khu ro lôi kâ tâi. Drêng pơreăng xông tâ tú râ má môi, châi klêa cho hâi lơ 7/8 ton troh hâi lơ 9/8 mê khu ro hlâ 2 to. Nôkố khu ro ki hên hiăng pơtân tơniăn hiăng vâ rêi nhâ, laga ai môi to ro vêh pơreăng nếo roh má 2 tung pơla 3 hâi kố ôh tá kâ’’.

Môi tiah mê, pakĭng 4 to hiăng hlâ, 22 to ro xo têa tôu ki ê dêi rơpŏng jâ Lê Thị Ánh Hồng, thôn Bồng Lai, cheăm Hiệp Thạnh, tơring Đức Trọng (kong pơlê Lâm Đồng), xuân pơtân tơkâ hluâ tơdroăng rơ-iô kố. Ai mâu ro hiăng pơxiâm vâ rêi nhâ. Tiô jâ Hồng, tơdroăng a ngiâ cho kal mơgêi ‘na hnoăng chêl, tŏng kum tro lŭp ăm mơngế păn.

“Kơbố ngế ki mơjiâng pro pơkeăng mê thế pôu râng hnoăng cheăng ƀă kuăn pơlê, thế chêl thiê̆n ro ăm kuăn pơlê. Nôkố tối pơreăng laga mê ai pơreăng klâi há? Ro hngêi á hdrối mê ôh tá ai nhâ tŭm vâ ăm gá rêi kâ, mê kơ’nâi mê ro ki lâi pâk pơkeăng pơrá tro tâ pơreăng tâi tâng. Nôkố xuân u ối 2 – 3 to ro ôh tá vâ rêi kâ nhâ, kơxo kố xuân thế pâk tơ’mot têa. Nôkố to lâi to ro hiăng pơlât prêi klêi mê hên to ro pơtối pơreăng nếo, pơtối tro tâ pơreăng nếo cho hlâ hlối’’.

Riân troh tâi hâi lơ 12/8, kong pơlê Lâm Đồng mơnhên ai 5.350 to ro xo têa tôu tro tâ pơreăng châi klêa ƀă 237 to ro tro hlâ, tơkŭm ki hên a 2 tơring Đơn Dương ƀă Đức Trọng. Kố cho mâu ro pơrá châ pâk vaccine NAVET-LPVAC hbrâ mơdât pơreăng êi kéa lo po pom, tung pơla sap ing hâi lơ 22 troh lơ 31/7/2024.

Tiô pôa Hoàng Sỹ Bích, Kăn pơkuâ Khu pơkuâ ‘na pêi chiâk deăng ƀă mơnhông mơdêk thôn pơlê kong pơlê Lâm Đồng, vaccine NAVET-LPVAC hbrâ mơdât pơreăng êi kéa lo po pom xua Kŏng ti tơlo liăn cheăng tê pơkeăng pơlât mơnăn trung ương (NAVET-LPVAC) châ rah xo ƀă tê pơkeăng. Tơdroăng há yă vâ châ rah xo ƀă tê ăm pơkeăng vaccine kố pơrá tơniăn tŭm pơkâ ƀă pêi tiô mâu pơkâ dêi luât. Pôa Hoàng Sỹ Bích tối ăm ‘nâi, mơhé apoăng mơnhên tơdroăng pâk vaccine ai tơdjâk troh ro pro chiâng pơreăng châi klêa, laga thế ai xiâm kối ki xiâm chiâng pơreăng ƀă hlâ lơ ôh mê kal tơkôm tối má mơ’nui dêi peăng kơ koan cheăng:

“Klêi kơ’nâi séa ngăn troh nôkố, tâi tâng kơxô̆ ro xo têa tôu tro pơreăng pơrá ối tung kơxô̆ hiăng pâk vaccine êi kéa lo po pom, laga mâu ro ki ôh tá pâk mê ôh tá tro tâ pơreăng. Laga, pin ôh tá chiâng vâ tối tiah mê, thế tơkôm tơdroăng mơnhên ƀă thế kơ koan cheăng ai hnoăng tơbleăng ƀă mơ-éa. Ngin xuân hiăng pâ thế vâ ôh tá tơdjâk pakong mê thế ai mơnhên inhên tơniăn krê. Tâng lơ xúa pơkeăng vaccine mê ngin kô pơkâ thế khu tê mơdró thế chêl thiê̆n liăn ăm kuăn pơlê’’.

Pakĭng 2 tơring Đơn Dương ƀă Đức Trọng, tơring Lâm Hà ƀă pơlê kong kơdrâm Bảo Lộc dêi kong pơlê Lâm Đồng xuân pơxiâm mơnhên ai ro xo têa tôu tro pơreăng châi klêa klêi kơ’nâi pâk vaccine hbrâ mơdât pơreăng êi kéa lo po pom. Tung mê, a tơring Lâm Hà hiăng ai 2 to ro xo têa tôu tro hlâ. Nôkố, tơdroăng hbrâ mơdât pơreăng châi klêa tung khu râ dêi kong pơlê Lâm Đồng dế châ mâu tíu cheăng pơlât mơnăn Trung ương ƀă kong pơlê thăm pêi pro.