VOV4.Xơ Đăng - Klêi kơ’nâi 3 hơnăm pêi pro tơdroăng tơkêa bro tơrŭm pêt mơjiâng tơmeăm, uâ mơdiê pro ƀă tê tơmeăm pêi lo ing chiâk deăng tiô Pơkâ 98 dêi Chin phuh ‘na troăng hơlâ mơhnhôk mơdêk tơrŭm cheăng, tơrŭm tung pêt mơjiâng tơmeăm ƀă tê tơmeăm pêi lo ing chiâk deăng, Lâm Đồng hiăng chôa ‘lâng mơdêk ki kơnâ mơjiâng tơmeăm tung rêm ƀăng ki pêt. Ki nhên, Lâm Đồng hiăng mơjiâng ƀă mơnhông mơdêk chiâng 182 tíu tơrŭm cheăng, ƀă vâ chê 16 rơpâu rơpŏng pêt tơmeăm ƀă 2.445 rơpŏng păn mơnăn mơnôa.

Tơmeăm pêi lo ing chiâk deăng tơrŭm pêt mơjiâng ƀă tê dêi Lâm Đồng

Mâu tơdroăng ki tơrŭm pêt mơjiâng tơmeăm kố châ pêt kân rơdâ 30.200 ha loăng plâi tŭm túa, tơmeăm pêi lo châ vâ chê 400 rơpâu tâ̆n; ƀă khu kơpôu ro chu – í peâp lối 850.500 to, châ 126.560 tâ̆n. Ki kơnâ mơjiâng tơmeăm ing tơrŭm tung hơnăm 2021 châ 14 rơpâu 378 rơtal liăn, châ 20% tung tâi tâng ki kơnâ mơjiâng tơmeăm khoăng dêi kơvâ pêi chiâk deăng tung kong pơlê. Tiô tối hdrối troh hơnăm 2023, Lâm Đồng ai 200 tơdroăng tơrŭm pêt mơjiâng tơmeăm ƀă tê tơmeăm pêi lo ing chiâk deăng, ƀă 30% tơmeăm pêi lo ing chiâk deăng ki xiâm kô châ tê ing kĭ tơkêa.

A Sa Ly tơplôu ƀă tơbleăng