Vâ tơniăn hnoăng pơxúa mơngế rôe xúa, kum mơdât tơdroăng lu lêa inâi kơchâi plâi pôm VietGAP vâ tê a mâu kơchơ kân siêu thĭ, kơchơ kân tung tơnêi têa, Lâm Đồng dế thăm séa ngăn, pêi kơtăng tơdroăng pơkuâ xiâm kối tơmeăm pêi lo ing chiâk deăng tung kong pơlê. Lâm Đồng nôkố ai lối 5.700 ha ƀăng pêt mơjiâng tơmeăm pêi lo ing chiâk deăng tiô pơkâ VietGAP, tâk vâ chê 320 ha ƀăng deăng mơnhên VietGAP tâng pơchông ƀă hơnăm nah.

Tiô pôa Nguyễn Hà Lộc, Kăn phŏ pơkuâ Khu pơkuâ ‘na pêi chiâk deăng ƀă mơnhông thôn pơlê kong pơlê Lâm Đồng, tung pơla achê kố ai tơdroăng tối mâu tơmeăm kơchâi drêh plâi pôm a kơchơ ki tê ăm apoăng, laga kơ’nâi mê châ kơxuô, tĕm tem inâi VietGAP ƀă tê ăm, tê a mâu kơchơ kân siêu thĭ a Pơlê kong kân Hồ Chí Minh.

Lâm Đồng hiăng ai lối 5.700 ha ƀăng pêt kơchâi drêh plâi pôm mơnhên VietGAP

Tơdroăng kố tơdjâk troh ivá, hnoăng pơxúa dêi mơngế rôe xúa ƀă tơdroăng ki loi tơngah dêi inâi kơchâi drêh Đà Lạt – Lâm Đồng. Kơvâ pêi chiâk deăng kong pơlê hiăng thăm séa ngăn ƀă thăm pêi pro tơdroăng lăm séa ngăn, mơdât ƀă pơkuâ krá tơniăn tơdroăng pêt mơjiâng, pro, tê mơdró tơmeăm pêi lo ing chiâk deăng VietGap tung kong pơlê, khŏm pơxâu phâk kơtăng mâu tơmeăm VietGAP ôh tá tơniăn dâi lĕm.