Tiô tơdroăng hneăng hôp 9 khế hiăng hluâ, tơdroăng pêt mơjiâng tê mơdró, mơ’no liăn cheăng, mơjiâng hngêi trăng, troăng klông ƀă tê rôe ngi kong têa ê tơmeăm a Dak Lak ƀă Dak Nông mơnhông tơniăn, hên pơkâ tâk tâng pơchông ƀă roh kố hơnăm nah. Krê Lâm Đồng kơlo tơtêk cheăng kâ ai tơtêk hrá. Tŭm 3 kong pơlê pơrá trâm pá puât, tơvâ tơvân tơdjâk troh tơdroăng tŏng kum tơnêi, tŏng kum hngêi ối ăm kuăn pơlê hdroâng kuăn ngo tiô Tơdroăng xiâm tơnêi têa ƀă tơdroăng xĕn kuăn pơlê tiô pơkâ...

Tiô pôa Nguyễn Văn Hùng, châ tơƀrê tung khế 9 hiăng hluâ ăm hlo 3 kong pơlê Dak Lak, Dak Nông, Lâm Đồng hiăng ai hên tơdroăng mơ-eăm, ki má lối cho tung mơnhông pêi chiâk deăng. Pôa Nguyễn Văn Hùng pơkâ thế 3 kong pơlê tơkŭm mâu troăng kêi đeăng pơkâ mơ’no hơnăm 2024. Tung mê, mâu kong pơlê kal pêi pro rĕng tơdroăng mơ’no liăn cheăng tơnêi têa, kêi đeăng mâu tơmeăm, tơdroăng tơkêa bro mơ’no liăn cheăng; tơtrŏng tâ mê nếo tơdroăng tơniăn gâk kring tơnêi têa; rak vế ƀă mơnhông mâu ki kơnâ ‘na khôi túa lĕm tro, hlối mơnhông khôi túa lĕm ƀă ôm hyô.