VOV4.Xơ Đăng - Hâi lơ 17/9 pơla hdrói kố nah, a tơring Krông Pač, kong pơlê Dak Lak hiăng tơkŭm po hâi ki apoăng mơ’no tê plâi sầu riêng tro tiô tơdroăng kĭ tơkêa pơla Khu xiâm ngăn ‘na chiâk deăng ƀă mơnhông thôn pơlê prế Khu xiâm ngăn ‘na tơrŭm mơdró kâ kong têa ê dêi Sinuâ. Tơdroăng kố, kum tơ’lêi hlâu kân ăm kơvâ pêi pêt plâi sầu riêng dêi Việt Nam châ mơ’no tê dêi plâi ki păng ‘nâng troh a kơchơ ki rôe hên má môi dêi lâp plâi tơnêi.

Plâi sầu riêng ki apoăng tê ngi kong têa ê tiô troăng ki pơto chơ tê ing tíu tơkăng kong ing mâu bo cheăng ƀă tơdroăng ki tê hên tiô tơkêa pơla Khu xiâm ngăn chiâk deăng ƀă mơnhông thôn pơlê Việt Nam ƀă Khu xiâm ngăn tíu tơkăng kong Sinuâ ai lối 300 tâ̆n châ pêt a kong pơlê Dak Lak. Kố cho kong pơlê ki ai ƀăng tơnêi pêt sầu riêng kân má péa tung lâp tơnêi têa (bu klêi kơ’nâi Tiền Giang) ƀă dâng 15 rơpâu ha, plâi sầu riêng hơnăm 2022 tiô riân châ dâng 170 rơpâu tâ̆n.

Pôa Y Giang Gry Niê Knơng, kăn phŏ hnê ngăn Vi ƀan kong pơlê Dak Lak phiu ro ăm ‘nâi, nôkố, kong pơlê hiăng châ Khu xiâm ngăn tíu tơkăng Sinuâ kĭ pơkâ 4 mah tíu ki tâ plâi sầu riêng tung kơthung ƀă 23 mah kơxô̆ kơpong pêt (châ vâ chê tơdế mah kơxô̆ kơpong pêt tung lâp tơnêi têa châ kĭ pơkâ). Rơtế ƀă ivá mơ-eăm dêi Khu xiâm ngăn chiâk deăng ƀă mơnhông thôn pơlê tung tơpui tơno, tơdroăng kố chêh hdró mâu tơdroăng ki mơ-eăm hên dêi mâu kuăn pơlê ki pêi chiâk deăng, khu mơdró kâ kong pơlê.

"Vâ ai mâu plâi sầu riêng ki apoăng châ tê tiô troăng tơkăng kong, bo cheăng ƀă tê hên châ tơbleăng tung rôh leh hâi kố mê mâu kơpong pêt, tíu ki tâ plâi sầu riêng tung kơthung hiăng athế hbrâ rơnáu ƀă tơkâ luâ hên tơdroăng ki séa ngăn dêi kơ koan rơkê cheăng dêi péa tơnêi têa, pêi pro châ tiô tơdroăng ki pơkâ thế séa ngăn mâu kế ki kâ ‘nhiê, tơniăn kế tơmeăm, pêi pro tro pơkâ ‘na tâ tung kơthung ƀă rak tơniăn tơdroăng ki tí tăng xiâm kối pêt mơjiâng”.

Pôa Lê Minh Hoan, ngế xiâm ngăn chiâk deăng bă mơnhông thôn pơlê lăm pôu ngăn kơpong pêt sầu riêng ki hiăng châ hbru ăm mah kơxô̆ kơpong pêt a tơring Krông Pač, kong pơlê Dak Lak

Tơpui a rôh leh, pôa Lê Minh Hoan, ngế xiâm ngăn chiâk deăng ƀă mơnhông thôn pơlê tối nhên, Tơdroăng pơkâ ‘na pơkâ thế séa ngăn kế ki kâ ‘nhiê châ kĭ a hâi lơ 11/7/2022 pơla Khu xiâm ngăn chiâk deăng ƀă mơnhông thôn pơlê Việt Nam ƀă Khu xiâm ngăn tíu tơkăng kong Sinuâ cho tơdroăng ki mơ-eăm tơpui tơno tung plâ ki ton khế hơnăm dêi mâu kơ koan pơkuâ cheăng pơla péa pâ. Rơtế amê cho tơdroăng ki rơtế mơ-eăm dêi pơlê pơla mâu ngế ki pêt ƀă tê sầu riêng Việt Nam.

Ngế xiâm pơkuâ tối nhên, tơdroăng ki tê plâi sầu riêng tiô troăng tơkăng kong, ing bo cheăng ki apoăng châ tơkŭm po cho tơdroăng ki phiu ro tơdjuôm dêi kuăn pơlê kơpong Tây Nam Bộ, Đông Nam Bộ ƀă Tây Nguyên. Kố cho môi tơdroăng ki po ai pơxúa kal khât xua Sinuâ cho kong têa ki roê plâi sầu riêng hên má môi lâp plâi tơnêi. Rơtế ƀă rôh tơ’lêi vâ châ achê ƀă kơchơ ki kân, kum khu mơdró kâ ƀă kuăn pơlê châ ki pơxúa ‘na laih hên sap ing plâi ki kố, tê ngi kong têa tiô troăng tơkăng kong, ing bo cheăng xuân pơkâ mơ’no tơdroăng pơloăng mơnúa ôh tá iâ xua mâu tơdroăng ki kal dêi dêi tơdroăng pơkâ pêi pro ki khât cho mâu tơdroăng pơkâ thế ‘na kih thuât pơklât thế pêt tâ tung kơthung ƀă tê ngi kong têa ê athế pêi pro tiô hlá mơéa.

Pôa Lê Minh Hoan tối nhên:

“Tung pơla lâp plâi tơnêi hơ’lêh ƀă pêi chiâk deăng ngiât, cheăng kâ tơrŭm tơdjêp môi tiah nôkố, hiâm mơno pêi pro prôk rơtế ƀă dêi rơpó cho pơklât thế. Plâi sầu riêng lơ mâu kế ki lâi ki pêi lo ing chiâk deăng ki ê rơhêng vâ lăm hơngế, athế ai môi kơchơ mơdró tơniăn mê mâu ngế krê tung tơdroăng ki kơnía dêi kế tơmeăm pêi lo ing chiâk deăng kal athế tơdjuôm ivá môi hiâm mơno, tơrŭm vâ rơtế xông tơtêk”.

Plâi sầu riêng ki tê ngi kong têa ê apoăng tê tiô troăng tơkăng kong, ki tê hên dêi Việt Nam

Tiô Khu xiâm pêt kế tơmeăm khoăng, tâi tâng ƀăng tơnêi pêt sầu riêng tơnêi têa nôkố châ vâ chê 90 rơpâu ha ƀă plâi sầu riêng rêm hơnăm dâng 1,3 rơtuh tâ̆n, châ pêt hên a Đông Nam Bộ, Tây Nguyên ƀă Tơbăng kroăng Cửu Long. Mâu kế tơmeăm, plâi sầu riêng dêi Việt Nam châ mơnhên tối khât ki dâi lĕm. Tơdroăng ki tê ngi kong têa ê tiô troăng tơkăng kong cho rôh ki tơ’lêi ki kơnâ  ƀă plâi sầu riêng ki ối drêh ƀă pơtối tơhrâ tơpui tơno vâ po kơchơ mơdró ăm mâu kế tơmeăm pêi lo ing chiâk deăng ki ê dêi Việt Nam tung la ngiâ.

Công Bắc chêh

Katarina Nga tơplôu ƀă tơbleăng