Châ môi măng tĭng kố, on veăng pôa Võ Văn Cao, ối a tôh 10, thôn Bồng Lai, cheăm Hiệp Thạnh, tơring Đức Trọng, kong pơlê Lâm Đồng kâ ôh ta kâi lŏn, koi ôh ta kâi hlâk, kơtâu hdâ lâp luô vâ tăng ƀok thái pơkeăng pơlât mơnăn veăng pơlât ăm khu ro ki tro pơreăng kố. Pakĭng 4 to ro păn xo têa tôu dế xiu, ối mo têi, tâi tâng 96 to ro têa tôu ki ê pơrá hlo ro a kố tro chôm, tâ pơreăng, châi klêa eâk lo mơheăm, tung mê, hiăng ai 2 to ro hiăng hlâ. Pôa Võ Văn Cao tối ăm ‘nâi, kơxô̆ ro ki tro châi klêa nếo  pâk vaccine hbrâ mơdât pơreăng êi khêi a klêa hdrối mê:

“Á pâk vaccine ăm 96 to ro, bu ối 4 to ro ki hiăng xiu á ôh tá pâk pơkeăng. Dế nôkố ai 10 to ro ki tro châi klêa, 2 to hiăng hlâ. Ai mâu ro ki ‘nâ ôh tá vâ rêi nhâ, mâu ro ki ê hiăng chôm, rơlâi rơlo ƀă hên tơdroăng ki ê, á tôu tuăn ó khât môi tiah ‘nân ối a kơpêng kơnoh on. Dế nôkố, rêm hâi á pơrá ‘no dêi pơkeăng chĕm ăm khu ro, ro kăn ro kuăn pơrá ăm ôu pơkeăng tâi. Pơkeăng ki mê pơrá xua tơná á rôe pá kong, pơkeăng ki ing tơnêi têa hbru ăm nếo ai a hâi hnah, la ki hên bu C-Gluco xo”.

Rơpŏng jâ Huỳnh Thị Kim Phượng, ối a thôn Lạc Nghiệp, cheăm Tu Tra, tơring Đơn Dương xuân ai 76 to ro xo têa tôu ki tro tâ pơreăng, 2 to hiăng hlâ. Tơdroăng kố bu hlo to lâi hâi kơ’nâi khu ro pâk vaccine hbrâ mơdât êi a kéa. Klêi kơ’nâi châ hlo tơdroăng ki ôh tá tơniăn, lo êi khêi a kéa, rơpŏng hngêi ki păn ro hiăng lăm krếo ƀok thái pơkeăng ki khăm mơnăn troh vâ pơlât, pâk têa pơkeăng ki rơdêi, pơlât la xuân ôh tá hâi châ mo rơdêi.

“Drêng pâk vaccine mê khu ro ôh ta vâ rêi nhâ xếo, khu ro kuăn ki lâi xuân tơngê. Ai ro ‘nâ châi klêa eâk lo mơheăm, ai kuăn ki ‘nâ châi klêa eâk lo ki prăng môi tiah trâp, 2 to ro hiăng hlâ. Thôn ngin xuân hiăng hlo ai to lâi chât rơpŏng tiah mê, la ai 8 rơpŏng ki ai ro ôh tá pâk vaccine. 8 rơpŏng kố ro xuân ối mo lĕm, ôh ta ai tơdroăng klâi, ối ai mâu rơpŏng ki ai ro pâk pơrá hlo ai tơdroăng tiah mê”.

Vaccine hbrâ mơdât pơreăng ki êi drô kéa châ pâk a khu ro têa tôu a 2 tơring Đơn Dương ƀă Đức Trọng xua Kŏng ti Tơlo liăn cheăng tê rôe pơkeăng dêi Tơnêi têa NAVETCO (ai tíu pêi cheăng a kong pơlê Bình Dương) châ ăm phêp tíu ki rôe ƀă tê pơkeăng ăm khu ro. Tơdroăng ki pâk vaccine ăm khu ro châ pêi pro sap ing hâi lơ 22 troh tâi hâi lơ 31/7/2024, tâi tâng hiăng ai 10 rơpâu klŏng pơkeăng. Klêi kơ’nâi hlo êi a kéa ro xo têa tôu hiăng tro tâ pơreăng ƀă hlâ, kong pơlê Lâm Đồng hiăng pơtê tơdroăng pâk vaccine.

Tiô pôa Nguyễn Văn Long - kăn pơkuâ ngăn tíu xiâm ngăn ‘na khăm pơlât mơnăn tối, drêng châ ‘nâi ing tơdroăng ki ro xo têa tôu a kong pơlê Lâm Đồng tro tâ pơreăng ƀă hlâ, kơxê hâi lơ 7/8, Khu kăn ngăn ‘na Chiâk deăng ƀă Mơnhông thôn pơlê hiăng hnê tối khu ki ngăn ‘na khăm pơlât mơjiâng khu lăm troh vâ séa ngăn, pơkâ pêi pro tơdroăng ki hbrâ, tơplâ, mơdât pơreăng.

“Ngin hiăng mơhnhôk ta mâu ƀok thái pơkeăng ki hriăn ngăn ki rơkê má môi ‘na kơvâ pơlât mơnăn dêi Việt Nam, mâu ki hriăn rơkê hiăng xo mơheăm ro mê vâ mơnhên ngăn pơreăng, ngăn pơreăng ki lâi ki xiâm khoh pro ro tro châi klêa, thăm nếo bê tâ pro hlâ khu ro ki păn a kong pơlê Lâm Đồng. Khu xiâm xuân hiăng ai hnê tối, mơnhên i nhên mâu troăng hơlâ vâ tơkŭm hbrâ mơdât pơreăng, túa cheăng pơkuâ ngăn vâ kơdroh tơdroăng ki tro pơreăng a khu ro, kơdroh tơdroăng ki ro tro hlâ”.

Tơdrêng ƀă tơdroăng ki veăng gum dêi Khu xiâm ngăn ‘na Chiâk deăng ƀă Mơnhông thôn pơlê, kong pơlê Lâm Đồng xuân hiăng tơkŭm ivá mơno vâ tí tăng ‘nâi xiâm pơreăng, ƀă túa ki vâ pơlât ăm khu ro, vâ pôi ta ai ro ki ê pơtối tro tâ pơreăng ƀă hlâ. Maluâ ti mê, kơxô̆ ro ki tro tâ pơreăng ƀă hlâ xuân u ối tâk. Riân troh tâi hâi lơ 10/8, kong pơlê Lâm Đồng hiăng mơnhên ai 4.495 to ro păn xo têa tôu tro tâ pơreăng ƀă 193 to ro hiăng hlâ, tâk vâ chê 699 to ro ki tro pơreăng ƀă 21 to ro hiăng hlâ tâng vâ pơchông ngăn ƀă hâi hdrối. Tơdrêng amê, ƀă hnoăng cheăng hbrâ mơdât pơreăng, mâu khu râ, kơvâ cheăng dế pơtối vêh mơnhên xiâm kối khoh chiâng ai pơreăng châ tâ tú a kơpuâ ro têa tôu a kong pơlê Lâm Đồng.