VOV4.Xơ Đăng - Việt Nam hiăng ai kơphế ki xú hŏm lĕm, dó inâi Fine Robusta hiăng châ kong têa lâp plâi tơnêi mơnhên tối, vâ khoh ai tiah mê xuân kal athế ai mâu ngế ki rơkê khât tung xúa kơmăi kơ-óu kơphế, ing mê, nếo ai tơmeăm vâ tê ăm kuăn pơlê ki xúa. Kố cho hnoăng cheăng pêi pro ki tơtro dêi Khu xiâm tơrŭm mơdró kơphế Ƀuôn Ma Thuột, ing mê khoh po hneăng tơ’noăng kơ-óu  kơphế Việt Nam hơnăm 2022 châ tơkŭm po a măng tĭng hdrối a kong pơlê Dak Lak.

Roh tơ’noăng kơ-óu kơphế Việt Nam 2022 (Vietnam Amazing Roast Master 2022) xua Khu pơkuâ kơphế Ƀuôn Ma Thuột tơkŭm po cho tơdroăng ki kal châ mơngế pêi kơphế tung lâp tơnêi têa tơmâng rơhêng vâ ‘nâi plĕng. Xua kố cho roh tơ’noăng apoăng châ tơkŭm po a Việt Nam ƀă râ tơnêi têa vâ pro ‘’plông xah hêi’’ ăm mơngế pêi ‘na kơphế ƀă chôa ‘lâng mơjiâng môi khu kơ-óu kơphế rơkê râ lâp plâi tơnêi, ki rơhêng vâ tối cho ‘na kơ-óu kơphế Robusta.

Ngế tơ’noăng Đoàn Tuấn Nhật ing kong pơlê Lâm Đồng tối ăm ‘nâi:

“Veăng roh tơ’noăng kố hlo tơdroăng ki rơkê plĕng cho kân ‘nâng, cho trâu hơngế. Cho môi ngế kơ-óu kơphế mê tung roh tơ’noăng kố mê thế chiâng mơnhên ki dâi lĕm pơ’leăng kơphế ngiât sap ing tơmeăm ki ê mâu kế ki ai tung pơ’leăng vâ pin kơ-óu pói vâ châ xo gá.

Pơtối kơ’nâi nếo klêi kơ’nâi ai kế ki ‘na pin xuân thế hơ’lâk vâ vêh mơnhên hiăng kơ-óu gá hôm tro tiô kơphế pơ’leăng há. Môi ngế kơ-óu rơkê, mê cho thế mơnhên chiâng tơmeăm hdrối mê ƀă kơ’nâi kơ-óu mâu tơdroăng kố pơrá ối tung tơdroăng tơ’noăng tâi tâng’’.

Ngế tơ’noăng mơnhên pơ’leăng kơphế ngiât lĕm ahdrối kơ-óu

Tung 4 hâi (sap ing hâi lơ 6 troh lơ 9/10), 35 ngế tơ’noăng troh ing 13 kong pơlê, pơlê kong kơdrâm tung lâp tơnêi têa hiăng tơkâ hluâ mâu tơdroăng tơ’noăng, mê cho: mơnhên pơ’leăng ngiât lĕm; hmâ ƀă kơmăi kơ-óu, kơmăi kơmok, tơmeăm vâ rơvât; tơkŭm kơ-óu; hơ’lâk, tơbleăng tơmeăm.

Ngế tơ’noăng Nguyễn Thị Thu Hương, troh ing kong pơlê Dak Nông tối, hdrối nah, mâu roh tơ’noăng kơ-óu tơtrŏng ‘na tơdroăng rơkê kơ-óu cho hên tâ laga roh tơ’noăng kố ối ai mơnhên mâu ngế ki rôe ôu ƀă pơ-ô tơmeăm kơphế xú hŏm Việt Nam, tơdroăng hâk vâ tiô khôi vâi krâ nah dêi mơngế Việt Nam. Xua mê, veăng roh tơ’noăng kố, mơngế kơ-óu ôh tá xê to ai hnoăng pro eăng ki xú kơhiâm ki vâ tơbleăng troh mơngế rôe ôu xuân môi tiah ‘nâi mơnhên tơdroăng châ tơƀrê tơmeăm kơ-óu dêi tơná.

“Nôkố, kơphế dêi Việt Nam dế pơ’lêh lĕm tâ ‘na ki dâi lĕm, xua mê tơdroăng hâk vâ dêi mơngế rôe ôu xuân châ mơnhông mơdêk tiô troăng ki nhên. Vâi hâk vâ ôu ‘na ki xú lĕm xuân môi tiah vâ ti tăng plĕng mâu pơkâ ‘na kơphế krúa lĕm, mâu tơdroăng tơdjâk troh xiâm kối tơmeăm ki xúa ƀă hía hé. Châ khât ‘nâng kố cho roh tơ’lêi kân vâ á kô pro tơniăn tâ ki xú hŏm lĕm kơphế tung tơdroăng kơ-óu kơphế dêi tơná mơdêk tơdroăng kơ-óu ăm tơmối dêi tơná rôe ô’’.

Ngế tơ’noăng pro ki tô kơmăi vâ kơ-óu kơphế

Tiô pôa Lê Đức Huy, Kăn pơkuâ Kŏng ti Simexco Dak Lak, Kăn phŏ Hnê ngăn Khu tơrŭm kơphế Ƀuôn Ma Thuột, mơngế rôe ôu kơphế Việt Nam hiăng ton châ 100 hơnăm rơtế ƀă tơdroăng mơnhông mơdêk dêi xiâm kơphế. Troh nôkố Việt Nam hiăng teăm tơdrêng tơdroăng hâk vâ ‘na kơphế, ki rơkê ‘na kŏng ngê̆  kơ-óu kơphế dêi lâp plâi tơnêi, mâu tơdroăng ki klâi rơkê má môi ‘na kŏng ngê̆ xuân hiăng ai a Việt Nam. Laga kơmăi kơmok xuân hiăng teăng kuăn mơngế, xua kal tơpoăng kơphế cho hên xua mê kal thế ai mâu ngế ki châ hnê mơjiâng tơtro, rơkê, xúa kơmăi kơ-óu ƀeăn ƀĕng nếo chiâng ai tơmeăm kơphế ki dâi lĕm.

Pôa Lê Đức Huy mơnhên:

“Tung tơdroăng dêi ngin tíu pêt mơjiâng cho kuăn pơlê pêi chiâk deăng ai kơphế mê mâu ngế ki xúa xuân thế ‘nâi mơdêk tơmeăm ki mê to a ‘ngêi. Ngế kơ-óu cho ngế ki tơdah kơphế pơ’leăng kố, xua mê vâ pơtối mơnhông mơdêk kơchơ mơdró ôh tá xê pin mơjiâng ai hên kơphế mê thế mơjiâng tíu ki kal vâ nếo. Tâng pin pêt mơjiâng hên lối râ tá tui lui ôh tá chiâng xúa mê vêh pơtối ai tơdroăng kơphế lối hên tiô tơdroăng kal vâ yă pơtối chu kơdroh’’.

Roh tơ’noăng kơ-óu kơphế Việt Nam ôh tá xê pơ-ô pơ-eăng mâu ngế kơ-óu rơkê mê ối pơ-ô pơ-eăng mâu pơ’leăng kơphế Robusta Việt Nam to tơxâng. Kố xuân cho tơdroăng pơtối nếo ki mâu ngế tá hiâm mơno ƀă kơvâ kơphế pói vâ troăng prôk la ngiâ vâ mơnhên Việt Nam ôh tá xê to pêt mơjiâng châ kơphế ki xú hŏm mê ối ‘nâi xúa, ôu kơphế ki kơhiâm kơ-óu pro trâu hơngế.

Hương Lý/VOV Tây Nguyên/Tơplôu: A Sa Ly