VOV4.Xơ Đăng - A rôh hôp tơbleăng po a kơxê lơ 3/10 a Hà Nội, pôa Phùng Đức Tiến, ngế xiâm phŏ ngăn chiâk deăng ƀă mơnhông thôn pơlê tối nhên, kô tơkŭm mâu troăng hơlâ ‘na kơchơ mơdró mơ-eăm châ 50 rơtal dollars kơxô̆ liăn châ xo ing tê kế tơmeăm pêi lo ing chiâk deăng, loăng pơlái, ká xi xŏng ngi kong têa ê tung hơnăm kố. Luâ 9 khế, pêi chiâk deăng pơtối rak vế ivá mơdek chía hên ƀă ivá mơdêk dêi mâu kế tơmeăm pêi lo ing chiâk deăng tê ngi kong têa ê ki xiâm.

Tâng pơchông ƀă khế kố hơnăm nah kơxô̆ liăn châ xo ing tê kế tơmeăm pêi lo ing chiâk deăng loăng pơlái, ká xi xŏng luâ 9 khế tâk 15,2%, tiô riân dâng 40,8 rơtal dollars Mih, mâu kế tơmeăm pêi lo ing chiâk deăng ƀă loăng pơlái xiâm, ká xi xŏng pơrá tâk.

Troh nôkố hiăng ai 7 to kế tơmeăm, khu kế tơmeăm châ kơnâ ‘na tê ngi kong têa ê lối 2 rơtal dollars Mih. Pơkâ pêi troh tơdroăng cheăng tâi tâng kơxô̆ liăn châ xo ing tê tơmeăm ngi kong têa ê loăng pơlái ká xi xŏng châ 50 rơtal dollars Mih tung hơnăm kố, tung mâu khế mơ’nui hơnăm, Khu xiâm ngăn chiâk deăng ƀă mơnhông thôn pơlê kô pơtối mơdêk kơvâ cheăng, mơdêk ki dâi lĕm, tơƀrê tung pêt, păn, tê mơdró, hnê mơhno, pơkâ troăng ăm mâu kong pơlê malối cho mâu kơpong ki xiâm ‘na pêt báu, păn mơnăn mơnoâ, ká xi xŏng ai túa pơkâ pêt, păn tơtro ƀă tơdroăng rơhêng vâ dêi kơchơ.

VOV Tây Nguyên/Tơplôu: Katarina Nga