VOV4.Xơ Đăng - Kơxê lơ 5/9, a Hà Nội, Khu xiâm ngăn chiâk deăng ƀă Mơnhông thôn pơlê hôp tơbleăng hneăng má 3 tơbleăng ‘na tơdroăng cheăng mơjiâng pro, tê mơdró kế tơmeăm pêi lo ing chiâk deăng ƀă tơbleăng hnoăng cheăng mâu khế mơ’nui hơnăm. 8 khế hdrối nah, ki kơnía dêi kế tơmeăm tê ngi kong têa tơmeăm pêi lo ing chiâk deăng, loăng, ká xi xŏng tiô riân châ 36,3 rơtal dollars Mih, tâk 13,1% tâng pơchông ƀă khế kố hơnăm nah.

Lâp kơvâ cheăng pơtối rak vế mơdêk, rak vế gâk kring kế kâ, veăng kum rak vế mâu tơdroăng ki pro tơdâng tơ’mô kân dêi cheăng kâ. Pakĭng tơdroăng ki ăm hlo hơniâp ro mê ‘na kế tơmeăm pêi lo ing chiâk deăng ki pêt mơjiâng xiâm tê ngi kong têa ê châ vâ chê 15 rơtal dollars Mih luâ 8 khế, tâk 7,4%, kơvâ pêi chiâk deăng xuân ai 7 kế tơmeăm ki kơnía tê ngi kong têa ê lối 2 rơtal dollars Mih, mê cho: kơphế, kơxu, phái, kơchâi, plâi, kloăng hôt, xi xŏng, tơmeăm pro ƀă loăng.

Pôa Phùng Đức Tiến kơhnâ pêi pro tiô pơkâ tê ngi kong têa kế tơmeăm pêi lo ing chiâk deăng 50 rơtal dollars Mih

Xuân a rôh hôp tơbleăng kố, mâu tíu pêi cheăng ối tung Khu xiâm ngăn chiâk deăng ƀă Mơnhông thôn pơlê xuân pêi pro nhên mâu troăng hơlâ mơdêk mâu khu kơvâ kế tơmeăm pêi lo ing chiâk deăng; mâu troăng hơlâ vâ tŏng kum kơnía dêi Vi ƀan Châu Âu - EC ƀă ká xi xŏng Việt Nam, mơ-eăm châ tơdroăng pơkâ tê ngi kong têa ai 50 rơtal dollars.

Katarina Nga tơplôu ƀă tơbleăng