VOV4.Xơ Đăng - Đông Mố đô̆i Gak tơkăng kong Lai Hòa kơhnâ tung pêi pro troăng hơlâ tŏng kum rêh ối pơlê pơla ăm kuăn pơlê, malối cho ƀă kuăn pơlê hdroâng kuăn ngo a kong pơlê. Krê túa pơkâ Hngêi pơkeăng khu lêng – ƀă kuăn pơlê tơrŭm ôh ti xê to pêi pro tro hnoăng cheăng pơlât ivá ăm kăn ƀô̆, lêng đông mố đô̆i gâk tơkăng kong mê ối pêi pro tro hnoăng cheăng khăm pơlât ăm kuăn pơlê a cheăm. Thạch Hồng, ngế chêh hlá tơbeăng cheăng tung Rơ’jiu Việt Nam a tơbăng kroăng Cửu Long ai chêh tối ‘na tơdroăng kố.

Lai Hòa cho cheăm ki xơpá dêi pơlê kong krâm Vĩnh Châu, ai hên kuăn pơlê hdroâng kuăn ngo Khmer, vâi krâ nhŏng o rêh ối ki hên cho ing tơdroăng ki pêi chiâk deăng ƀă tơnăng ká xi xŏng. Xua mê, vâ tăng cheăng pêi, cheăng kâ, vâi krâ nhŏng o hmâ troh khăm pơlât sap ing kơxo má. Tiô Thiê̆u tă Thái Minh Phong, kăn pơkuâ Hngêi pơkeăng Khu lêng ƀă kuăn pơlê Đông mố đô̆i gâk tơkăng kong Lai Hòa, vâ teăm khăm ăm vâi krâ nhŏng o, klăng a 6 chôu kơxo rêm hâi cho kăn ƀô̆ ngăn pơkeăng dêi hngêi pơkeăng hiăng ai mâ vâ khăm ăm mâu ngế ki châi tamo. Malối, vâi krâ nhŏng o troh a hngêi pơkeăng khăm ki hên cho ôh ti xê tung chôu pêi cheăng, xua mê, hngêi pơkeăng xoăng hnoăng cheăng ăm kăn ƀô̆ khăm pơlât gâk plâ hâi plâ măng vâ kum tro má môi hnoăng cheăng rak ngăn ivá ƀă pêi tro dêi hnoăng cheăng dêi môi ngế ƀok thái pơkeăng ƀă mâu ngế ki tamo.

Kăn ƀô̆ lêng, mâu ngế cheăng tung hngêi pơkeăng kum kơhnâ khât, vâi krâ nhŏng o troh mê á rak ngăn, khăm pơlât, ôh tá ăm vâi krâ nhŏng tơkôm ton. Tơkôm khăm ƀă hbru pơkeăng rĕng teăm vâ vâi krâ nhŏng o vêh pêi cheăng. Vâi krâ nhŏng o mơnhên tối khât ‘na hngêi pơkeăng kố”.

Xua tơdroăng tá hiâm mơno mê dêi mâu ƀok thái pơkeăng krâ kơlŏng ngiât ƀă tâi hiâm mơno ƀă ngế ki châi tamo mê hiăng châ tơdroăng ki loi tơngah ăm kuăn pơlê. Nôkố, rêm hâi hngêi pơkeăng kố tơdah khăm ƀă hbru pơkeăng ăm lối 30 ngế. Y sih Kiên Na Riêl kăn ƀô̆ ngăn pơkeăng dêi hngêi pơkeăng ăm ‘nâi, á cho mơngế Khmer mê ‘nâi nhên ‘na tơdroăng rêh ối dêi vâi krâ nhŏng o a thôn pơlê, iâ kơbố ‘nâi nâl Xuăn. Drêng hlo ƀok thái pơkeăng troh xo má vâ khăm, xúa nâl Khmer vâ tơpui ƀă hnê vâi túa ki rak ngăn ivá mê vâi krâ nhŏng o phiu ro khât. Kố xuân cho ivá vâ ƀok thái pơkeăng Hngêi pơkeăng Khu lêng ƀă kuăn pơlê Đông mố đô̆i gâk tơkăng kong Lai Hòa pêi pro tro hnoăng cheăng dêi tơná.

“Hên ngế vâi krâ nhŏng o ôh tá ‘nâi nâl Xuăn, drêng á tơpui nâl Khmer mê vâi ro khât. Drêng á ‘nâi tơpui nâl Khmer mê xuân tơ’lêi hlâu tung tơdroăng ki hnê mơhno ăm vâi krâ nhŏng o tung tơdroăng ki ôu pơkeăng, hnê vâi rak ngăn ivá châ chăn, hbrâ mơdât pơreăng ƀă hên ki ê môi tiah tơngê lo mơheăm, kơtêi kơtâu têi lơ nŭm nheăn ƀă hên ki ê.

Xua ối kơtăn ing tíu xiâm cheăm mê hên vâi krâ nhŏng o a mâu kơtâu dêi cheăm Vĩnh Tân, mâu kơtâu Prey Chóp, Prey Chóp A, Prey Chóp B, ối tung cheăm Lai Hòa pơrá lăm troh, pơlât a hngêi pơkeăng. Thiê̆u tă Thái Minh Phong, kăn pơkuâ hngêi pơkeăng Khu lêng ƀă kuăn pơlê Đông mố đô̆i gâk tơkăng kong Lai Hòa ăm ‘nâi, kuăn pơlê a mâu troăng, a kĭng têa kơxĭ dêi pơlê kong krâm Vĩnh Châu, kong pơlê Sóc Trăng ƀă vâi krâ nhŏng o a cheăm ki tơkoh kĭng ối tung kong pơlê Bạc Liêu xuân lăm troh akố pơlât. Rêm hơnăm, Hngêi pơkeăng kố tơkŭm khăm, pơlât ƀă hbru pơkeăng ăm dâng 10 rơpâu ngế tamo. Ƀă tơdroăng mê, hngêi pơkeăng ối hnê tối ăm vâi krâ nhŏng o ‘na túa ki hbrâ mơdât mâu pơreăng môi tiah: Tơngê hmân, pơreăng tơê̆n kŏng chêng rơkong, tơngê lo mơheăm ƀă hên pơreăng ki ê. Malối, kăn ƀô̆ hngêi pơkeăng troh a rêm hngêi hnê tối ‘na túa ki hbrâ mơdât pơreăng COVID-19 ăm vâi krâ nhŏng o hlê. Ing mê, rơtế tơdjuôm ivá ƀă khu kăn pơkuâ hbrâ mơdât pơreăng COVID-19 tơƀrê.

“Á xuân hnê tối rêm hâi, môi tiah xoăng hlá mơ-éa hnê tối ‘na pơreăng COVID-19, tung pơla hdrối kố nah pơreăng hlo tâ tú nếo mê hngêi pơkeăng xuân hnê tối ăm vâi krâ nhŏng o pôi tá tơkŭm ối ƀă dêi rơpó, truâ kên pâng môh rơkong, mơgrúa lĕm dêi chêng kŏng ƀă kơƀŏng, mơgrúa lĕm hngêi trăng. Hnê tối rêm hâi, tâng vâi krâ nhŏng o hlo tơngê hmâ mê á mơhnhôk vâi thế ối a hngêi, hngêi pơkeăng kô troh a hngêi vê ngăn ki hngíu tôu môi hâi 2 xôh vâ séa ngăn”.

Nôkố, Hngêi pơkeăng Khu lêng ƀă kuăn pơlê Đông mố đô̆i gak tơkăng kong Lai Hòa ai 5 ngế kăn ƀô̆ ngăn pơkeăng vâ kum ăm hnoăng cheăng khăm pơlât. Maluâ tá hâi ai ƀok thái pơkeăng la hngêi pơkeăng kố xuân ối châ kuăn pơlê loi tơngah troh khăm drêng châi tamo. Hlo vâi krâ nhŏng o ôh tá tô tuăn ‘na troăng hngế hngo troh hngêi pơkeăng khăm, mâu lêng, ƀok thái pơkeăng đi đo mơ-eăm khăm pơlât, plâi hâi plâ măng. Tơdroăng ki phiu ro dêi kuăn pơlê drêng hiăng prêi lĕm cho ivá vâ mâu vâi ngoh hmiân tuăn ối ƀă kuăn pơlê, pêi klêi hnoăng cheăng ki châ pơcháu.

Hiăng vâ chê 20 hơnăm hdrối nah, Hngêi pơkeăng Khu lêng ƀă kuăn pơlê Đông mố đô̆i gâk tơkăng kong Lai Hòa, Mố đô̆i Gâk tơkăng kong Sóc Trăng hiăng chiâng tíu ki loi tơngah, djâ tơdroăng ki loi, tơdroăng ki ro ăm mâu ngế ki châi tamo kơtiê, malối cho kuăn pơlê hdroâng kuăn ngo Khmer tíu tơkăng kong têa kơxĭ.

VOV4 chêh

Katarina Nga tơplôu ƀă tơbleăng