VOV4.Xơ Đăng -  Drêng ai pơreăng xông tâ tú ó, ƀă kơxô̆ ngế tro tâ COVID-19 rế hía rế tâk, tung hâi lơ 5/1, Kăn hnê ngăn Vi ƀan pơlê kong kơdrâm Đà Lạt, Lâm Đồng hiăng pơkâ mơjiâng 16 hngêi pơkeăng cheăm troh lâp lu a tâi tâng mâu cheăm, bêng dêi pơlê kong kơdrâm. Jâ Trần Thị Vũ Loan, Kăn phŏ hnê ngăn Vi ƀan pơlê kong kơdrâm Đà Lạt tối ăm ‘nâi, tơdroăng mơjiâng mâu hngêi pơkeăng cheăm ki troh lâp lu cho kal khât vâ rak ngăn ăm mâu ngế pơlât pơreăng COVID-19 a hngêi, tơdrêng amê, hbrâ ƀă rêm tơdroăng a mâu tíu pơlât drêng pơreăng COVID-19 xông tâ tú ó.

Pơreăng COVID-19 pơtối xông tâ tú ó, Đà Lạt mơjiâng 16 hngêi pơkeăng cheăm ki troh lâp lu

Xêo troh nôkố, pơlê kong kơdrâm Đà Lạt châ hlo tâi tâng lối 2.200 ngế tro tâ COVID-19, tung mê ki hên hiăng châ pơlât prêi ƀă lo hngêi pơkeăng. Nôkố u ối 784 ngế dế châ pơlât, tung kơxô̆ kố ai lối 400 ngế pơlât a hngêi; 8/16 cheăm, bêng dêi pơlê kong kơdrâm ai pơreăng xông tâ tú râ 3 – râ ki rơ-iô ƀă COVID-19.

A Sa Ly tơplôu ƀă tơbleăng