VOV4.Sêdang - Kơxê lơ 7/6, a tơraih tơ-ƀai lâp plâi tơnêi Nội Bài, Kŏng ti veăng tơlo liăn Pacific Foods hiăng tê khu plâi treăng kêt dro Thanh Hà, Hải Dương ki apoăng ngi châu Âu tiô tơdroăng kĭ tơhrâ tê mơdró tơniăn pơla Việt Nam ƀă EU ( EVFTA). Tung măng tĭng la ngiâ kô ai khu plâi treăng kêt dro Lục Ngạn, Bắc Giang xuân lăm tê ăm kuăn pơlê a 27 to kong têa ki pơrah má môi.

A hâi leh, pôa Vũ Bá Phú, Kăn xiâm ngăn ‘na tê mơdró Khu xiâm ngăn tê mơdró ăm ‘nâi: mơhé tơdjâk xúa pơreăng Covid- 19 la Khu xiâm hiăng tơrŭm ƀă Khu xiam ngăn pêi chiâk ƀă mơnhông thôn pơlê pêi hên troăng hơlâ tơdrêng môi tiah ing hơnăm 2021 vâ tăng tíu ki vâ rôe tung tơnêi têa ƀă malối tê ăm kong têa ê.

Nôkố chât tâ̆n plâi treăng kêt dro dêi 2 kong pơlê Hải Dương ƀă Bắc Giang hiăng hlo tê a hên siêu thĭ kong têa Nhuk, Singapore. Ƀă péa pái hâi la ngiâ kố ah cho mâu kong têa EU - kong têa ki ai 430 rơtuh ngế kuăn pơlê. Ăm hlo tơ-ƀrê mê cho ing tơdroăng mơ-eăm tơdjêp, tăng tíu tê tung rôh plâi treăng kêt dro hơnăm 2021.

Gương tơplôu ƀă tơbleăng