VOV4.Xơ Đăng - Hâi lơ 19/12, a pơlê kong kơdrâm Plei Ku, kong pơlê Gia Lai, Khu xiâm pơkuâ ‘na pêi chiâk deăng ƀă mơnhông thôn pơlê rơtế mâu kong pơlê Tây Nguyên tơkŭm po ‘’Hneăng hôp tơpui tơno thăm tơkŭm po pêt mơjiâng tơmeăm kơpong tơnêi pơkâ pêi vâ mơdêk pêi lo tơmeăm ƀă mơnhông krá tơniăn kơvâ kơphế Tây Nguyên’’. Tơnêi têa nôkố ai vâ chê 700 rơpâu hectar kơphế, pêi lo lối 1,79 rơtuh tâ̆n/hơnăm, cho kong têa tê kơphế ngi kong têa ê hên má péa tung lâp plâi tơnêi. Tung mê, 92% ƀăng deăng ƀă 95% tơmeăm mơjiâng a mâu kong pơlê Tây Nguyên.

Pôa Lê Minh Hoan, Ngế xiâm xông tơpui a roh hôp tơpui tơno

A hneăng hôp tơpui tơno, mâu kăn teăng mâ pơkâ thế tơnêi têa ƀă khu xiâm kơvâ cheăng kal mơjiâng troăng tŏng kum khu tê mơdró mơjiâng inâi ƀă mâu tơdroăng mơnhên ki dâi lĕm kơphế lâp plâi tơnêi, ki rơhêng vâ tối a mâu kơchơ tê mơdró ki pá má môi mơtiah EU, Mih, Nhuk.

Pôa Lê Minh Hoan, Ngế xiâm pơkuâ ‘na chiâk deăng ƀă mơnhông thôn pơlê tối ăm ‘nâi, la ngiâ, Khu xiâm kô mơjiâng môi tơkêa krê ‘na tê tơmeăm khoăng ngi kong têa kơpong châu Âu, vâ mơnhên troăng pêi ton xŏn djâ kơphế ƀă mâu tơmeăm pêi lo ing chiâk deăng Việt Nam tung mâu kong têa ki kân. Mâu khu tê mơdró kal mơjiâng khu tơrŭm mâu kong têa pêt mơjiâng kơphế vâ ‘nâi tơdroăng kal vâ, tơdroăng ki hâk vâ dêi kuăn pơlê ƀă pơkâ luât, ‘na kih thuât dêi mâu kong têa.

A Sa Ly tơplôu ƀă tơbleăng