Mâu hâi ki kố, a troăng prôk tơkăng kong tung cheăm Quảng Trực, kong pơlê Lâm Đồng, eăng dêi hlá cơ khêi hơlŏng trĭng tung kong ngo drêh ngiât ƀă tung mâu ƀăng chiâk deăng kơphế, mắc ca, tiu. Troh kong măng, on tơhrik bâ eăng a hên troăng prôk. Mê cho troăng prôk “châ krâ ‘măn pul on tơhrik bâ eăng a troăng tơkăng kong xua Đoân Droh rơtăm cheăm Quảng Trực pro. Ngoh Y Nhật Minh, Phŏ hnê ngăn Vi ƀan Măt trâ̆n Tơnêi têa, Ngế pơkuâ Đoân cheăm ăm ‘nâi, tung lâp cheăm hiăng krâ lối 5 km pul on mơ’no bâ eăng, vâ rak vế gâk kring tơniăn, vâ pơlê cheăm tơniăn lĕm.

Drêng hâk phiu rơnó hơngui,hâk phiu Đảng, hơnăm ối nếo cheăm tơkăng kong Quảng Trực veăng lăm pơtrui ngăn a troăng tơkăng kong rơtế ƀă mố đô̆i gâk tơkăng kong ƀă tơkŭm po mâu tơdroăng mơhno túa lĕm tro, ngê̆ thuât, tôu chêng koăng, kơ’nhon xuăng, pro chiâng hơniâp ro phiu niu.

“Bô bố xuân ai ƀă hnoăng cheăng rak vế krá tơniăn tíu tơkăng kong, Đoân cheăm Quảng Trực ối djâ túa lĕm tro khôi hmâ vêh ƀă tơdroăng rêh ối pêi cheăng dêi đoân. Mâu rôh hôp đoân tro ƀă chêng koăng, hơdruê hdroâng M’Nông hiăng gum đoân viên veăng mot cheăng đoân đi đo tâk sap ing 60% troh 85%. Hơnăm la ngiâ, Đoân cheăm kô pơtối po rơdâ túa pêi krâ pul on a troăng tơkăng kong, tơkŭm po thế hên droh rơtăm lăm pơtrui ngăn, rế hnê tối vâ rêm ngế đoân viên pơrá ai cheăng pêi, tơrŭm tro ƀă pơlê cheăm tơná”.

Mơngiơk rơnó hơngui dế ai mâ a cheăm Thuận An, kong pơlê Lâm Đồng, tíu tơdroăng tơ’noăng túa lĕm tro, văn ngê̆ droh rơtăm châ rak vế đi đo. Ngoh Y A Rôn, Phŏ pơkuâ Đoân cheăm ăm ‘nâi, sap ing hơnăm 2022 nah troh nôkố, ngoh hiăng tơkŭm po lối 20 rôh hôp, hnê rơngê, ting ting M’Nông, tơ’mot lối hrĭng ngế đoân viên, droh rơtăm veăng. Hên vâi pú hơnăm ối nếo sap ing tá hâi ‘nâi hơdruê nôkố hiăng chiâng tiah tơhmâ, mơđah tơbleăng tung mâu rôh po mơdĭng dêi pơlê.

Hơnăm 2025 kố nah, ngoh Y A Rôn hâk tơngăm veăng tung khu kăn droh rơtăm Việt Nam ƀă “Hành trình đỏ - hriăn plĕng, hriâm tâp dêi droh rơtăm” a Sinuâ. Ngoh tối:

“Rôh lăm mê gum á hlê plĕng hên tơdroăng, malối cho hlo hnoăng cheăng dêi droh rơtăm M’Nông tung rôh ki nếo. Châ trâm hên ngế châ tơpui tơno hriâm ƀối mâu tơdroăng ki tro ‘ló dêi mâu vâi pú tung tơnêi têa ƀă kong têa ê. Hơnăm la ngiâ, á kô pơtối mơjiâng mâu kâu lak ƀô̆ rơngê ting ting droh rơtăm, hlối quay clip, ăm rơngê, ting ting M’Nông châ mơđah tung măng pơlê pơla vâ hên ngế ‘nâi troh, vâ mâu hơnăm ối nếo hâk tơngăm ƀă pôi tá piu xiâm rêi dêi tơná”.

Rơtế ƀă mâu tơdroăng pêi pro túa lĕm tro, hên droh rơtăm M’Nông a Lâm Đồng hiăng tơnôu pơxiâm pêi cheăng sap ing túa lĕm tro hdroâng kuăn ngo. A ƀon Du Dak, cheăm Thuận An, Hler, ngế droh mơngế M’Nông, hiăng pro túa pơkâ tê̆n ếo pơtâk chal krâ, tăng cheăng pêi đi đo ăm lối 10 ngế nâ o, pêi lo liăn pá xôp 5 rơtuh rêm ngế rêm khế. Rĕng rơkê ƀă mâu tơdroăng ki vâ xúa chal nôkố, nâ ăm mâu tơmeăm mơ’no tung Facebook, Zalo, TikTok, hmâ livestream tơbleăng tơmeăm. Nâ H’Her ăm ‘nâi: Túa pêi kố hiăng châ kâ pri ối má Pái a rôh tơ’noăng vâi kơdrâi pơxiâm pêi cheăng kong pơlê Dak Nông hdrối nah.

“Á rơhêng vâ mâu o ‘nâi tê̆n ếo pơtâk vâ tê châ liăn tơ’nôm, vâi krâ nhŏng o vâi kô rak xêh cheăng tê̆n kố. Á rơhêng vâ mâu tơmeăm ếo pơtâk M’Nông ôh ti xê tê tung tơnêi têa mê ối châ tê tung mâu kơchơ điê̆n tưh dêi kong têa ê, vâ hên ngế ‘nâi ƀă hâk vâ tâ túa lĕm tro tơná”.

Tung kơvâ cheăng ngê̆ thuât, ca sih Điểu Náp Bunong, nôkố pêi cheăng a kơvâ túa lĕm tro kong pơlê Dak Lak, hiăng rah xo cheăng pro ngê̆ thuât pro kông tơdjêp vâ ăm túa lĕm tro M’Nông troh achê tâ ƀă kuăn pơlê. Tung mâu ƀai hơdruê, ngoh chêh xo mâu tơdroăng chal krâ M’Nông, tơrŭm ƀă hơdruê tiô chal nôkố ƀă mâu proâ Tây Nguyên, pro ăm gá hơniâp ro tâ, ai hên ivá tơdjâk. Ca sih Điểu Náp Bunong tối ki ro: pơla kố nah ƀan nhak Nap Bunong Band dêi ngoh châ kâ pri A túa chal krâ ƀă chal nôkố ƀă nhak nhĕ a Liên hoan mâu ƀan nhak kong pơlê Dak Lak po rơdâ 2025. Ƀâng YouTube “Điểu Náp Bunong Sfficial” ƀă mâu tơdroăng mơđah ngê̆ thuât, tung mê mơhno nhên túa ki krê dêi túa lĕm tro M’Nông hiăng tơ’mot hên mâu ngế hơnăm ối nếo po ngăn.

“Rêm ƀai á veăng hơdruê pơrá rơhêng vâ gum ăm mâu hơnăm ối nếo hlê tiah kố túa lĕm tro M’Nông ôh ti xê to tơdroăng dêi ton nah, mê dế rêh ối tung tơdroăng nôkố. Hơnăm la ngiâ, á rơhêng vâ ai tơ’nôm mâu ƀai chêh tối tơdroăng rêh kâ ối chal nôkố dêi kuăn pơlê, vâ túa lĕm tro pơtối châ tơdjêp tiô túa ki chiâng xêh”.

Sap ing mâu troăng prôk “Bâ eăng troăng tơkăng kong”, troh tơdroăng pơxiâm pêi cheăng ing tê̆n ếo pơtâk hdroâng kuăn ngo, tơmiât pêi rơkê ngê̆ thuât djâ vế ihiâm ngo ngối,kong kế mâu tơdroăng pêi pro tơniăn dêi mâu vâi pú hơnăm ối nếo M’Nông dế veăng pro pơhlêh ngiâ méa pơlê cheăm, vâ tơdroăng rơtế prôk rơtế pơhlêh nếo. Mot tung rơnó hơngui Bính Ngọ 2026, hơnăm ối nếo M’Nông pơtối tơdjâk ki rơhêng vâ pleăng, tơdjuôm ivá mơjiâng pơlê cheăm tơniăn lĕm, kro túa lĕm tro, păn roăng tơdroăng loi tung la ngiâ bâ eăng krá tơniăn dêi Tây Nguyên.