Ahdrối mot hơnăm nếo, vâ mơhnhôk mâu vâi o hok tro hdroâng kuăn ngo mơ-eăm hriâm tâp, tơring pá puât Tu Mơ Rông, kong pơlê Kon Tum hiăng tơkŭm po ăm 40 ngế hok tro hdroâng kuăn ngo Rơteăng rơkê hriâm tâp hơnăm 2023 – 2024 ƀă 4 thái cô hnê rơkê lăm a Hà Nội tơbleăng hnoăng pleăng ăm Pôa Hồ.

Xuân môi tiah veăng mâu tơdroăng ki châ tâ pêng păm tơdroăng ki kơnâ. Tung troăng prôk 5 hâi, sap ing hâi lơ 12 – 16/8/2024 lăm a Pơlê kong xiâm Hà Nội lăm pôu tíu ‘măn poăng Pôa Hồ. Khu ai 40 ngế hok tro hdroâng kuăn ngo Rơteăng rơkê tung hriâm tâp ƀă 4 thái cô hnê rơkê dêi tơring Tu Mrông châ troh lăm pôu hên tíu chôu ‘măn tơmeăm khoăng ton nah: Kơpong tíu chôu ‘măn tơmeăm ton nah Ngã ba Đồng Lộc, kong pơlê Hà Tĩnh; Tíu chôu ‘măn tơmeăm khoăng ton nah Pôa Hồ Chí Minh, Kăn xiâm hnê ngăn tơnêi têa a Kim Liên, Nam Đàn, kong pơlê Nghệ An.

A Pơlê kong xiâm Hà Nội Khu hok tro hriâm rơkê hdroâng kuăn ngo Rơteăng mot lăm pôu Tíu chôu ‘măn poăng Pôa Hồ ƀă lăm pôu kơpong chôu ‘măn tơmeăm Pôa Hồ Chí Minh, Kăn xiâm hnê ngăn tơnêi têa hneăng apoăng a Tíu pêi cheăng Kăn xiâm hnê ngăn tơnêi têa rơtế mâu tíu ki lĕm mơnâ mâ ngăn dêi pơlê kong xiâm.