Klăng roh leh tơbâ hâi tơdroăng pêi cheăng pơlê pơla Việt Nam roh má 7, kơxo lơ 23/3, a Hà Nội, Khu xiâm pơkuâ Đoân Droh rơtăm Kŏng san Hồ Chí Minh tơrŭm ƀă Khu xiâm pơkuâ cheăng pêi Mô đô̆i rong ƀă rêh ối pơlê pơla tơkŭm po Hneăng hôp tơpui tơno lâp plâi tơnêi ‘’Bro kêi đeăng luât mơnhông mơdêk tơdroăng kum rêh ối pơlê pơla a Việt Nam’’. Mâu hơnăm hiăng hluâ, Đảng ƀă Tơnêi têa pin hiăng đi đo tơmâng, tơbleăng hên troăng hơlâ tơleăng mâu tơdroăng pơlê pơla ki nếo tung mơnhông mơdêk.

Mâu pơkâ dêi luât ƀă troăng hơlâ kum rêh ối pơlê pơla hiăng châ tơbleăng ăm pêi pro tơ’nôm hnoăng dêi Tơdroăng pêi cheăng pơlê pơla, môi tiah: Khu luât pêi cheăng; Luât mơngế hơnăm hiăng krâ; Luât mơngế chó chêng tơvê kŏng; Luât vâi hdrêng, Pơkâ kơxô̆ 20 dêi Chin phuh pơkâ troăng hơlâ tŏng kum pơlê pơla ƀă mơngế tŏng kum pơlê pơla.

A hneăng hôp tơpui tơno, mâu ngế rơkê, ngế cheăng khoa hok tơkŭm tối túa ki rơkê tơtro lâp plâi tơnêi  ƀă tơdroăng nôkố tơdroăng pêi cheăng kum pơlê pơla a Việt Nam vâ kêi đeăng luât ƀă tơdroăng pêi cheăng pơlê pơla; tơpui tơno ‘na tơdroăng pêi cheăng pơlê pơla tung kơvâ khăm pơlât, hngêi trung hriâm; Ki kal tung ối rêh dêi tơdroăng tơrŭm cheăng ƀă pơlê pơla tung mơnhông mơdêk mâu tơdroăng gâk kring vâi hdrêng.