Sap ing mơ’nui hơnăm nah troh nôkố, a tơring Dak Rlâp, kong pơlê Dak Nông tơvâ tung tơdroăng tăng xo tơnêi vâ kum tơdroăng cheăng dêi Hngêi kơmăi alumin Nhân Cơ pơrá ai tung tâi tâng a mâu kơvâ cheăng, ing kơpong ki chiâ xo meăm tá troh a kơpong ki pêi cheăng a kơpong kơxô̆ 3 dêi long trâp khêi ƀă rơchôa má 2 long hdoăng trâp klêi kơ’nâi xếo eâk meăm. Vi ƀan hnê ngăn kong pơlê Dak Nông hiăng mơjiâng khu vâ tí tăng tah lôi mâu tơdroăng ki xahpá, tơvâ tơvân tung pơla pêi hnoăng cheăng dêi kong pơlê Dak Nông-TKV, khu ki pơkuâ ngăn hngêi kơmăi chiâ xo alumin Nhân Cơ, ối tối cho Tôh 1644.

Pôa Nguyễn Quang Tứ, Kăn hnê ngăn Vi ƀan tơring Dak Rlâp tối ăm ‘nâi, ƀă tơdroăng ki hnê tối krâu khât dêi Vi ƀan hnê ngăn kong pơlê ƀă tơdroăng tơrŭm krá kâk dêi mâu khu râ, kơvâ cheăng, hnoăng cheăng tăng tíu ki vâ kum ăm hngêi kơmăi mơjiâng pro trếo alumin Nhân Cơ dế rế hiá rế châ tah lôi. Ki nhên ga, drêng chiâ xo bauxite hơnăm má 4 troh hơnăm 6, pơla sap ing hơnăm 2020 - 2022 hiăng mơhnhôk thế 18 rơpŏng pơcháu dêi tơnêi tíu, tâi tâng tơnêi tíu mê rơdâ dâng 15 ha; pêi pro klêi tơdroăng ki pơcháu tơnêi vâ pro kơpong kơxô̆ 2 tíu hdoăng trâp vâ ‘mâi rơnêu tíu ki tơxê kơmăi. Tơring dế rơtế ƀă mâu khu râ, kơvâ cheăng tah lôi mâu tơdroăng chêh bro hlá mơ-eá ki mơjiâng 6 kơpong ki vêh pro pơlê nếo ăm kuăn pơlê:

“Tơmeăm khoăng vâ kum ăm hngêi kơmăi pêi cheăng mê tơring hiăng pơcháu ăm TKV ai 15 ha vâ pêi cheăng troh hâi lơ 15/4. Dế nôkố, ai 3 tơdroăng cheăng athế pêi pro, mê cho pơklât thế 1 rơpŏng athế châ tíu ê, rak vế ƀă pêi cheăng thế 5 rơpŏng châ ƀă mơhnhôk 17 rơpŏng mơdrếo tơnêi tơ’nôm 13 ha nếo mê kô tơniăn ăm tơnêi ki vâ ăm hngêi kơmăi pêi cheăng troh hâi lơ 1/6. Ki má pái nếo, kơxô̆ tơnêi ki u ối kô pêi cheăng a hơnăm má 7, má 8, ai 77 rơpŏng ki mơdrếo tơnêi châ 73 ha, tung mê, ai 40 rơpŏng vêh pro pơlê nếo, mê tiô tơdroăng ki pơkâ khế 4 kố tơring kố pơkâ ăm 2 kơpong ki tăng tíu pro pơlê nếo”.

Pôa Nguyễn Bá Út, Kăn ngăn ‘na Khu cheăng kơmăi kơmok - mơdró kâ Dak Nông, cho Tôh phŏ Tôh cheăng 1644 dêi Vi ƀan hnê ngăn kong pơlê Dak Nông tối tiah kố, tơdroăng ki tô tuăn má môi dế nôkố a tíu chiâ xo Alumin Nhân Cơ, mê cho tơnêi tíu ƀă tíu ki vâ hdoăng 3 long trâp khêi, long ki hdoăng má 2 Hngêi kơmăi chiâ xo eâk meăm xuân tá hâi teăm chiâng pêi cheăng, xua u ối 11 rơpŏng tá hâi teăm châ tíu ê. Kong pơlê hiăng pơkâ thế Vi ƀan hnê ngăn tơring Dak Rlâp thâ rĕng tơpui tơno, lông mơhnhôk ƀă mâu rơpŏng kuăn  pơlê, mơnhên ngăn vâ veăng kum tơ’nôm tiô tơdroăng pơkâ, ƀă ai troăng hơlâ pêi pro kơtăng luâ tâ nếo:

“Dế nôkố, dế tơkŭm ki hên cho tí tăng kơxô̆ liăn rôe tơmeăm khoăng ăm hngêi kơmăi pêi cheăng, la tiô khu ki pơkuâ ngăn vâi tối tơniăn. La tơnêi tíu  ăm tơdroăng vâ pro a kơpong kơxô̆ 2, kơxô̆ 3 ối tơvâ tơvân hên ‘nâng, thăm nếo, ai tíu ‘nâ kuăn pơlê ôh tá vâ tơrŭm cheăng, mê kal athế ai troăng hơlâ ki mơnhên. Tíu kố ôh tá châ xo tơnêi tíu mê maluâ vâ ai tơmeăm pêi cheăng xuân ôh tá chiâng pêi, tơkéa vâ tối, hngêi kơmăi xuân pơtê cheăng”.

‘Na tơdroăng tah lôi ki xahpá, tơvâ tơvân tung pơla pêi pro hnoăng cheăng dêi Kŏng ti Nhôm Dak Nông, tiô pôa Lê Trọng Yên, Kăn phŏ hnê ngăn Vi ƀan hnê ngăn kong pơlê Dak Nông, kong pơlê hiăng ai troăng hơlâ ki hnê mơhno nhên ăm tơrêm kơvâ cheăng, Vi ƀan hnê ngăn tơring Dak Rlâp xuân môi tiah peăng kŏng ti Nhôm Dak Nông. Mâu kơ koan, khu râ, kơvâ cheăng athế pêi pro kơtăng luâ tâ nếo, tơkŭm hên tâ nếo vâ pêi pro klêi tơdroăng cheăng pơcháu, rak tơniăn ăm Hngêi kơmăi alumin Nhân Cơ pêi cheăng tơniăn, kum kal khât tung tơdroăng mơnhông pêi cheăng kâ pơlê pơla.