Kong mêi ton hâi hiăng pro tơnêi rơlâm tơhnâp a taluy xŏn dâng 15m tung kơpong hngêi kuăn pơlê ối a bêng 3, pơlê kong kơdrâm Đà Lạt, kong pơlê Lâm Đồng. Mâu kăn kong pơlê hiăng djâ thế xĕn tơdrêng mâu rơpŏng kuăn pơlê lo ing kơpong ki rơ iô. Tơdroăng djâ xĕn kuăn pơlê châ Vi ƀan bêng 3, pơlê kong kơdrâm Đà Lạt pêi pro tơdrêng hlối tung kơxo hâi lơ 5/9, ƀă 5 rơpŏng kuăn pơlê, 13  pơ’leăng mâ mơngế, ối a hẻm 23 troăng An Bình.  

Hdrối mê, a kơmăng lơ 4/9,  kuăn pơlê tung kơpong mê tâng chuât têi ƀă kĭng taluy a’ngêi dâng 15m dêi hem mê tơhnâp, hlối ai hên tơnêi hiu pro tơhnâp mơnât hngêi pôa Nguyễn Văn Phước (kơxô̆ 136 troăng Hà Huy Tập). Drêng tơnêi tơhnâp, tung hngêi ai 6 ngế, la mơhúa ôh tá ai ngế ki lâi tro rong, hiăng rĕng djâ ối tíu ê.

Hlo tơdroăng kong prâi ôh tá tơniăn xua tơdjâk khía kân rôh má 3 plong mot, mâu kăn cheăm akố hiăng pơkâ thế djâ 5 rơpŏng kuăn pơlê, ƀă 13 pơ’leăng mâ mơngế tung kơpong tơnêi tơhnâp lăm ối a tíu tơniăn. Pakĭng mê, hlối tơbleăng lâp lu ‘nâi tíu ki rơ-iô, vâ tơniăn tơmeăm khoăng ƀă pơlê.