Vi ƀan pơlê kong kơdrâm Đà Lạt dế mơjiâng pơkâ tơbleăng túa mơnúa mơdêk cheăng kâ a kơmăng, ai tiô púi vâ dêi mơngế ki lăm ôm hêi,  rôe tơmeăm, kâ kế a kơmăng ăm kuăn pơlê a kong pơlê ƀă tơmối. Tung pơkâ mơnúa mơnhông cheăng kâ a kơmăng, ki hdrối, Đà Lạt kô tơkŭm tơbleăng mơnúa a kŏng viên tơdrá têa a kơdrum reăng pơlê kong kơdrâm, tơkŭm po mơđah hơdruê xuăng rêm kơmăng ƀă chiâng ai mâu tíu lăm ôm hyô, rôe tơmeăm a kơpong xiâm.

Tơdrêng amê, mơjiâng kơphế pơchên kế kâ, troăng kơphô̆ kơmăng a mâu troăng kân ƀă kơpong Plông kân Lâm Viên. Rêm tíu mơnúa xuân môi tiah tơkŭm po hên tơdroăng pêi pro hên tơmeăm ai tiô mơngế vâ xah, rôe kế kâ a kơmăng ăm tơmối troh.

Tung pơla hơnăm 2023 - 2030, Đà Lạt kô tơbleăng tơ‘nôm mâu túa kơphô̆ prôk chêng, tơkŭm mâu tơdroăng mơđah hơdruê xuăng drêng tơmối troh rôe tơmeăm, lăm ngăn têa long, xĕn, ‘măn pro nếo kơchơ kơmăng tiô túa nếo nôkố, ăm lĕm mơnâ mâ ngăn, chiâng tíu tơkŭm cheăng kâ a kơmăng mê cho mâu tíu xah hêi, kơpong ki ai hên tơdroăng xah hêi.