Klêi kơ’nâi leh tơdah, Đăi tươ̆ng Phan Văn Giang hiăng tơpui tơno ƀă Đăi tươ̆ng Tea Banh. A rôh tơpui tơno, Đăi tươ̆ng Phan Văn Giang prế Đăi tươ̆ng Tea Banh môi tuăn tối, hơnăm 2022 kố nah cho hơnăm ai pơxúa khât ƀă tơdroăng tơrŭm cheăng pơla péa tơnêi têa, châ kăn xiâm péa tơnêi têa pơkâ cho hơnăm “Tơrŭm pơla Việt Nam - Kul, Kul - Việt Nam’’.

‘Na troăng rơhlâ tơrŭm cheăng tung la ngiâ, Đăi tươ̆ng Phan Văn Giang prế Đăi tươ̆ng Tea Banh môi tuăn mâu tơdroăng kal Pơkâ tơrŭm hbrâ cheăng lêng ing tơdroăng loi nhoăm, pêi tro khât, tơƀrê, rơdêi a mâu tơdroăng kal: Mơdêk tơrŭm tơpui kâ tối ăm dêi rơpó ‘nâi mâu tơdroăng, tơrŭm séa ngăn, tí tăng ngăn rak tơniăn troăng a tơnêi ƀă a têa kơxĭ; tơrŭm tơbleăng tơbrê tơdroăng cheăng tơdjâk troh ki kal hơnăm Kul chêh inâi po SEA Games 32 ƀă ASEAN Para Games 12; pơtối tơmâng khât tơrŭm cheăng tung mâu kơvâ hnê mơngế cheăng, tơrŭm tăng, tơkŭm, djâ vêh kơxêng kiâ mâu lêng ki pleăng hnoăng tơná ƀă mâu ngế rơkê Việt Nam ki hiăng hlâ a kong têa Kul tung rôh tơplâ  nah.