Hâi lơ 17/2, Đăi tươ̆ng Tô Lâm, Ngế xiâm ngăn Kŏng an hiăng ai mâ ƀă hnê mơhno tơdroăng mơgêi hneăng hôp 10 hơnăm rak vế, pêi pro Tơdroăng pơkâ dêi Đảng xiâm tơnêi têa má 8 ‘na hnoăng cheăng kring vế tơnêi têa tung chal nếo a mâu kong pơlê Dak Nông ƀă Dak Lak. Đăi tươ̆ng Tô Lâm hiăng kơdĕn khĕn mâu tơdroăng ki hiăng châ chiâng pêi pro, ai tơbrê ki 2 kong pơlê Dak Nông prế Dak Lak hiăng châ chiâng pêi pro tung mâu khế hơnăm hdrối mê hía nah.

Hnoăng cheăng mơjiâng Đảng hiăng ai hên tơdroăng ki hơ’lêh, tơtro ƀă tơdroăng pói rơhêng vâ tung mơjiâng ƀă kring vế tơnêi têa a chal nếo nôkố; rêm ngế kuăn pơlê hiăng hlê plĕng tung kring vế, rak ngăn pơlê pơla, rak tơniăn tơdroăng rêh ối, cheăng kâ pơlê pơla, hnoăng cheăng lêng tung kring vế, kŏng an gak ngăn xuân hiăng châ mơnhông, thăm mơdêk, ing mê, rak tơniăn tơdroăng rêh ối pơlê pơla, kring vế tơniăn troăng tíu tơkăng kong.

Đăi tươ̆ng Tô Lâm pâ thế 2 kong pơlê Dak Nông prế Dak Lak kal athế mơnhông tâ nếo tung tơdroăng ‘mâi mơnhông tơrŭm pơla mâu hdroâng kuăn ngo, hnối rak vế tá tơdroăng lĕm tro, khôi túa, vêa vong ki tơniăn dêi mâu hdroâng kuăn ngo, ing mê, mơjiâng chiâng tíu ki xiâm vâ kring vế rak ngăn tơnêi têa tung chal nếo.