Hâi lơ 14/12. Vi ƀan kong pơlê Dak Lak tơkŭm po  leh mơgêi diâp pri ăm khu pú hên, mâu ngế ki rơkê veăng tơ’noăng mơ’no tơdrêng tung troăng hyôh Internet tí tăng ‘nâi vâ hlê tơdroăng pơ’lêh cheăng dêi kong pơlê hơnăm 2022. Hneăng  tơ’noăng tơdrêng mơ’no tiô troăng hyôh Internet tí tăng ‘nâi plĕng túa pêi cheăng dêi kong pơlê Dak Lak hơnăm 2022 châ tơkŭm po sap hâi lơ 15/11 troh hâi lơ 30/11/2022, tơ’mot 17.700 ngế veăng.

Khu tơkŭm po hiăng diâp 1 pri pú hên ăm tíu pêi cheăng ai hên kơxô̆ ngế kăn ƀô̆ kŏng chưk, viên chưk ƀă mơngế pêi cheăng veăng má môi ƀă 26 pro mơhá ăm mơngế ki ai tơdroăng tiâ tro hên má môi, ai chôu tiâ rĕng má môi.

Tiô Vi ƀan kong pơlê Dak Lak, hneăng tơ’noăng ôh tá xê to veăng mơdêk tơdroăng hnê tối ‘mâi hơ’lêh cheăng mê ối hnê khât vâ mơjiâng khu kăn kong pơlê Dak Lak lĕm tiô túa nếo pro pơxúa ăm kuăn pơlê, mê rêm ngế kăn ƀô̆, kŏng chưk, viên chưk kal thế hriâm, hriâm hên vâ hlê, mơdêk hnoăng cheăng pêi, ai hiâm mơno lĕm; Xo kuăn pơlê pro xiâm, xo tơdroăng ki môi tuăn dêi kuăn pơlê pro hdrối vâ tối ki tơbrê tơdroăng cheăng dêi khu kăn tơnêi têa.