A kơpong tơkăng kong, kong pơlê Dak Lak, pôa Mai Văn Chính, Phŏ Ngế pro xiâm hnê ngăn tơnêi têa hiăng tơbleăng thế pro hngêi trung phôh thong hdroâng kuăn ngo ai tíu kâ koi ối pơtê péa râ Râ má môi ƀă Râ má péa Ia Rvê. Tơdroăng tơkêa kố châ pro a ƀăng tơnêi kân lối 5 hecta, tâi tâng kơxô̆ liăn pro lối 185 rơtal liăn.

Cheăm Ia Rvê cho cheăm ki tơkoh ƀă Kul, tơdroăng rêh kâ ối dêi kuăn pơlê ối hên xơpá. Troăng lăm troh hngêi trung hriâm dêi mâu vâi o hok tro kơpong tơkăng kong ối hngế, hngêi trung hriâm, kơƀăng tăng ‘nân tá hâi ai tŭm. Xua mê, mâu vâi o cho mâu ngế ki ro má môi drêng hngêi trung ai tíu kâ koi ối pơtê la nôu pâ vâi chê̆m mơ’rêh dêi péa râ châ pro. O Lang Thị Yến Vy, hok tro lâm 7, Hngêi trung râ má péa Nguyễn Thị Định, tối:

“Drêng ‘nâi hngêi trung châ pro nếo, á ro khât ƀă tơkôm khât, rơhêng vâ rĕng ai hngêi trung nếo vâ hriâm gá tơniăn tâ”.

Ƀă pôa Vi Xuân Thủy a cheăm Ia Rvê, ăm ‘nâi vâi krâ kuăn pơlê phiu ro khât ƀă hmiên tuăn tung tơdroăng hriâm dêi kuăn ‘nĕng drêng ai hngêi trung hriâm péa râ ai tíu kâ koi ối pơtê lĕm kâk.

“Tâi tâng mâu vâi nôu pâ dêi mâu vâi o hok tro ƀă vâi krâ kuăn pơlê tung cheăm pơrá phiu ro khât. Ngin mơnê Tơnêi têa hiăng tơmâng tŏng gum pro ăm hngêi trung nếo, vâ mâu vâi muăn ai hngêi trung hriâm tơniăn tâ. Ai hngêi trung lĕm, nôu pâ vâi o hok tro ngtin kố xuân hmiên tuăn tâ drêng ăm kuăn troh hngêi trung hriâm tâp”.

Rơtế ƀă hngêi trung ki châ pro a cheăm Ia Rvê, tung rôh kố kong pơlê Dak Lak ối pro 2 to hngêi trung ai tíu kâ koi ối pơtê péa râ ki ê nếo mê cho: Hngêi trung phôh thong péa râ ai tíu kâ koi ối pơtê cheăm Ia Lốp ai kơxô̆ liăn ‘no pro cho 105 rơtal liăn, Hngêi trung phôh thông péa râ cheăm Buôn Đôn châ ‘no liăn pro lối 158 rơtal.

A Gia Lai, pôa Hồ Quốc Dũng, Phŏ Ngế pro xiâm hnê ngăn Chin phuh veăng ai mâ a leh pơxiâm pro Hngei trung phôh thong hdrông kuăn ngo ai tíu kâ koi ối pơtê péa râ Râ má môi ƀă Râ má péa a 7 to cheăm tơkăng kong mê cho Ia Mơ, Ia Púch, Ia Pnôn, Ia Nan, Ia Dom, Ia Chia ƀă Ia O, ƀă tâi tâng kơxô̆ liăn pro lối 1.500 rơtal liăn. Mâu hngêi trung ki châ pro kố kô cho ivá hriâm tâp tơniăn, krá ton ăm lối 7000 ngế hok tro kơpong tơkăng kong Gia Lai, ki hên cho hok tro hdrông kuăn ngo.

Tơpui a a leh pơxiâm pro, pôa Hồ Quốc Dũng, Phŏ Ngế pro xiâm hnê ngăn tơnêi têa tối nhên: tơdroăng tơkêa kố cho tơdroăng ki kal khât ƀă kơpong tơkăng kong, gum mơjiâng mâu ngế cheăng, ‘mâi mơnhông khô̆i tơrŭm ƀă rak vế krá tơniăn gâk kring tơnêi têa.

“Pakĭng troăng hơlâ tŏng gum mê kăn pơkuâ cheăm, thái cô yăo, nôu pâ mâu vâi o hok tro ai hnoăng mơhnhôk kuăn ‘nĕng tơná troh hngêi trung hriâm tâp tŭm. Mâu vâi muăn hmiên tuăn hriâm tâp a hngêi trung nếo ôh tá ăm vâi muăn pơtê hriâm. Mê cho pơkâ pêi dêi Khu xiâm pơkuâ tơdroăng kal kí a rôh Mơgêi kơxô̆ 81, hnê mâu ngế pêi cheăng a tíu tơkăng kong Tơnêi têa. Mâu vâi muăn xo ah hmôi drêng hiăng lo hngêi trung mê vêh akố mơjiâng pơlê cheăm, rak vế gâk kring tơkăng kong, rak vế tơniăn pơlê pơla a cheăm bêng”.

Tơmâng xo rơkong hnê mơhno sap ing pôa Phạm Anh Tuấn, Phŏ Ngế pro xiâm hnê ngăn tơnêi têa, Phŏ pơkuâ ngăn Đảng, Kăn hnê ngăn UBND kong pơlê Gia Lai tơhrâ tơbleăng pro tơdroăng tơkêa ƀă khŏm mơeăm khât ‘na cheăng kal kí ƀă pêi pro kơtăng, tơƀrê. Kong pơlê xuân rak tơniăn tŭm mâu thái cô, tơdjêp hngêi trung tơmeăm xúa ki kal, pro klêi tơdroăng tơkêa tro pơkâ.

“Kăn pơkuâ mâu tíu pêi cheăng, kơ koan ki ai tơdjâk tối kố cho tơdroăng pêi pro ki kal, kal athế tơbleăng pêi ƀă túa pơkâ: rĕng, krá, tơƀrê; hbrâ rơnáu mâu thái cô, hngêi trăng tơmeăm xúa ki kal môi tiah troăng prôk, têa krúa, on tơhrik, viễn thông ƀă hên ki ê rĕng pro klêi troăng hơlâ tŏng gum mâu thái cô, hok tro, vâ mâu hngêi trung ai tŭm tơdroăng vâ pêi cheăng sap ing apoăng hơnăm hriâm 2026-2027”.