Hâi lơ 27/2, a  Vi ƀan cheăm Ea H’Đing, tơring Čư̆ Mgar, kong pơlê Dak Lak, Khu pơkuâ ngăn Đoân Droh rơtăm Dak Lak tơkŭm po leh pơxiâm pêi cheăng khế Droh rơtăm hơnăm 2023 ƀă hên tơdroăng pêi ai pơxúa, tơkŭm a tơdroăng pơ’lêh kơxô̆ tung đoân viên, droh rơtăm ƀă kuăn pơlê. Ƀă tơdroăng pơxá “Droh rơtăm djâ troăng a hdrối tung tơdroăng pơ’lêh kơxô̆” Khế droh rơtăm hơnăm kố dêi Dak Lak kô tơbleăng pêi 10 tơdroăng cheăng ki kân râ kong pơlê, tơkŭm a mâu tơdroăng mê cho: Pêi pro Tơmeăm khoăng droh rơtăm pơ’lêh kơxô̆ Kơpong tíu tơbâ ƀă tíu ôm hyô; Tơkŭm po hneăng hôp “Hơnăm ối nếo Dak Lak ƀă tơdroăng cheăng túa lĕm tro ton nah tung tơdroăng kơxô̆”; Mơhnhôk tơ’noăng hriăn plĕng ki nếo ăm đoân viên, droh rơtăm kong pơlê Dak Lak rôh má I; trâm mâ, tơpui tơno pơla mâu kăn kong pơlê ƀă mâu tíu pêi cheăng, kơvâ cheăng ‘na tơdroăng cheăng droh rơtăm,... Ing mê pêi 12 tơdroăng pơkâ xiâm tiô troăng rơhlâ, hnê mơhno dêi khu Kăn râ kơpêng.

Nâ H’Giang Niê, Kăn hnê ngăn Đoân Droh rơtăm kong pơlê Dak Lak ăm ‘nâi: tơdroăng hơ’lêh kơxô̆ cho tơdroăng pêi pro ki xiâm châ mâu hơnăm ối nếo Dak Lak tơkŭm pêi tung khế droh rơtăm hơnăm kố.