Cho môi tung mâu droh rơtăm kơhnâ djâ troăng ahdrối, xúa troăng pêi pêt mơjiâng tơmeăm nếo, ngoh Y Luật Niê, hdroâng kuăn ngo Rơđế, ối a pơlê Mghĭ, cheăm Yang Mao, tơring Krông Bông, kong pơlê Dak Lak nôkố dế mơnhông mơdêk troăng pêt pêt hên hdrê loăng plâi, păn hên hdrê mơnăn. Tung ƀăng deăng lối 2 ha tơnêi dêi rơpŏng, ngoh pêt hên loăng plâi môi tiah loăng hré, kơphế, plâi sầu riêng, sik ƀă chiâ klôh têa kân rơdâ 100 met karê vâ păn kơpáu.

Ngoh ối tê hdrê loăng plâi, rôe kơphế drêh vâ mơdêk pêi lo liăn. Y Luật Niê tối: cho đảng viên hơnăm ối nếo, chiâng ing tơdroăng pêi cheăng đoân, hô̆i a pơlê, ngoh đi đo kơhnâ kơ-êng hriâm ƀối, xúa mâu troăng pêi nếo, mơhno tơdroăng ki djâ troăng ahdrối, pêi pro hdrối dêi mơngế đảng viên.

‘’Á cho đảng viên hơnăm ối nếo đi đo ai tơmiât tung ko cho đảng viên prôk hdrối pơlê tiô kơ’nâi. Á xuân lăm ngăn hên troăng pêi tung kong pơlê ƀă kong pơlê ki ê, ing mê xúa pêi a kơdrum hngêi tơná, hlo ki lâi châ tơ-ƀrê mê pơtâng tối ăm vâi krâ kuăn pơlê pêi tiô’’.

Xuân môi tiah Y Luật, tung pơla kố nah, hên droh rơtăm a cheăm Yang Mao chiâng rơkê ing mâu tơdroăng pêi cheăng đoân, hô̆i hiăng châ tơbleăng hriâm mâu lâm ti tăng plĕng hlê plĕng ‘na Đảng ƀă cho kuăn pơlê ki kơhnâ rơkê châ séa ngăn ‘mot mot Đảng. Tung 7 hơnăm hiăng hluâ, Đảng ủy cheăm hiăng tơ’mot châ vâ chê 90 ngế đảng viên nếo, kơxô̆ mơjiâng tơ’mot đảng viên rêm hơnăm pơrá châ tơƀrê ƀă tâk hên tâ ƀă hnoăng pơcháu.

Troh nôkố, cheăm Yang Mao ai vâ chê 300 ngế đảng viên ối tung 18 chi ƀô̆ thôn, pơlê ƀă mâu kơ koan, khu râ.

Pôa Trần Thế Thành, Kăn pơkuâ hnê ngăn cheăng Đảng cheăm Yang Mao tối ăm ‘nâi, pá puât tơdjuôm tung tơdroăng mơjiâng Đảng a cheăm cho ti tăng mơngế vâ hnê tơ’nôm mot tung Đảng. Xua hên kuăn pơlê ki kơhnâ rơkê đi đo pêi cheăng kâ hơngế, pá puât tung tơdroăng mơnhên lĭ lĭch. Mơhé ti mê, mâu chi ƀô̆ hiăng thăm mơhnhôk, tơrŭm ƀă mâu khu tơrŭm cheăng, khu râ ki ê vâ teăm châ hlo tơdrêng , tŏng kum, hnê tơ’nôm vâ ‘’mơdâ’’, mơjiâng đảng viên a rêm chi ƀô̆.

‘’Pêi pro mâu tơdroăng ‘’Droh rơtăm pơxiâm tăng cheăng pêi, rơxông ối nếo rak tơnêi têa’’ mơhnhôk ăm Đoân Droh rơtăm mơjiâng mâu troăng pêi cheăng kâ klêi mê mơhnhôk droh rơtăm pêi cheăng xuân môi tiah veăng pêi mâu tơdroăng pơlê, ing mê mơjiâng mơngế, pro mơhnhôk ăm nhŏng o rế mơnhông cheăng kâ, rế veăng tung mâu tơdroăng cheăng Đảng, rế pêi cheăng a thôn pơlê. Tơdroăng ki kal cho thế mơjiâng tơdroăng ki hâk vâ ăm mâu muăn, mâu muăn mê kơxiâp vâ mot Đảng, kơxiâp mâu tơdroăng pêi cheăng rêm hâi.

Mê nôkố mơjiâng mâu khu tơdroăng ki hâk vâ, djâ mâu muăn lăm ngăn troăng pêi klêi mê vêh a hngêi pêi pro. Ing mâu troăng pêi dêi mâu khu tơdroăng ki xiâm kố vâ po rơdâ tung cheăm’’.

Tiô mơnhên tối dêi Khu pơkuâ tơdroăng cheăng tơring Krông Bông, mơhé cho tơring kơpong hơngế hơngo ƀă pá puât, laga cheăm Yang Mao đi đo cho tíu ki eăng tung tơdroăng mơjiâng đảng viên a tơring Krông Bông tá ‘na ki dâi lĕm ƀă kơxô̆ mơngế hên. Cheăm đi đo tơmâng mơjiâng đảng viên troh mơngế hơnăm ối nếo, mơngế hdroâng kuăn ngo. Tơdrêng amê tơtrŏng mơdêk ki dâi lĕm tung pêi cheăng chi ƀô̆, xuân môi tiah ki dâi lĕm tung pêi cheăng, séa ngăn tung khu đảng.

Rơtế ƀă hnoăng dêi khu râ kăn pơkuâ hnê ngăn cheăng Đảng ƀă mâu chi ƀô̆ mê hnoăng dêi ngế ối a ko đảng ủy cho kal khât. Pôa Lâm Thanh Tùng, Kăn pơkuâ tơkŭm po tơdroăng cheăng Đảng tơring Krông Bông mơnhên, ƀă túa ki rơkê tơtro ton hơnăm tung pêi cheăng Đảng, kăn pơkuâ hnê ngăn cheăng Đảng cheăm Yang Mao hiăng ai hên troăng pêi pro tung tơdroăng ti tăng mơngế vâ mơjiâng ‘mot mot Đảng.

‘’Cheăm Yang Mao xuân cho môi cheăm kơpong hơngế hơngo, ai kơdrâm vâi krâ kuăn pơlê hdroâng kuăn ngo. Tơdroăng hnê mơjiâng, ‘mot tung đảng viên a  mâu hơnăm hdrối mê hía nah trâm pá puât, tơvâ tơvân. Laga, ƀă tơdroăng khŏm mơ-eăm dêi pôa Thành ƀă Khu pơkuâ hnê ngăn Đảng ƀô̆ mê tung mâu hơnăm hiăng hluâ Đảng ƀô̆ cheăm Yang Mao hiăng đi đo pêi tơtro tơdroăng mơjiâng đảng viên, ki má lối ing kuăn pơlê ki kơhnâ rơkê cho mơngế vâi krâ kuăn pơlê hdroâng kuăn ngo.

Mâu tơdroăng châ tơƀrê kố hiăng kum kal khât tung hnoăng kum ăm Đảng ƀô̆  tơring pêi kêi đeăng mâu tơdroăng mơjiâng đảng viên tung tâi tâng Đảng ƀô̆, ki rơhêng vâ tối tung kơpong vâi krâ hdroâng kuăn ngo’’.

Tơmâng trâu hơngế, rơtế ƀă mâu tơdroăng ƀă tơdrêng ƀă kuăn pơlê hiăng kum mâu chi ƀô̆, đảng ƀô̆ a cheăm Yang Mao teăm châ hlo tơdrêng, hnê  tơ’nôm kuăn pơlê ki kơhnâ tơkê vâ ‘mot tung Đảng, mơdêk khu đảng viên a pơlê. Drêng ối tung Đảng, rêm đảng viên đi đo mơdêk hiâm mơno tơkâ hluâ pá puât vâ mơnhông cheăng kâ, djâ troăng ahdrối tung mâu tơdroăng cheăng dêi thôn, pơlê. Mơdêk hiâm mơno djâ troăng ahdrối tung mơjiâng thôn pơlê nếo, kum mơjiâng pơlê rế hía rế kâi tơtêk.