Tiô tối tơbleăng, troh kơxê hâi lơ 12/11, lâp tung kong pơlê ai lối 10.000 toăng hngêi tro tơtêa kuâ, 9.200 toăng hngêi tro têa lu, 282 to hngêi trung ƀă 13 hngêi pơkeăng cheăm tro tơ’nhiê, 269 km troăng tro tơnêi tơhnâp, 19 to kông, klŏng cho mơ’no têa tro têa mơhiu. Riân ki tro lŭp la hâi riân tâi châ lối 2.500 rơtal liăn, tung mê krê ‘na păn ká xi xŏng lŭp dâng 1.300 rơtal liăn. Klêi khía plong mot, Dak Lak hiăng krếo tâi tâng mâu lêng veăng mơgrúa ‘mâi rơnêu mâu tíu tơ’nhiê, tơkŭm pro hdrối cho nêu mơdâng mâu trăng, pro troăng kơxái on tơhrik, ‘mâi pro troăng prôk ƀă mơgrúa hngêi trung hriâm, hngêi kuăn pơlê.

Kong pơlê Dak Lak hiăng xoăng lối 80 rơtal liăn kơjo kum tơdrêng, kum kuăn pơlê ‘mâi rơnêu pro hngêi, ‘mâi mơnhông pêi cheăng kâ, hlối tơniăn ăm kuăn pơlê rêh ối klêi hiăng hiăng luâ. Kơvâ ngăn pơkeăng ƀă mâu cheăm bêng tăng ngăn nhên ôh tâ túa pơreăng.