Hâi leh tơbleăng ôu kơphế tê kơtê tơkŭm po tro roh pơxiâm po Leh tơbleăng kơphế Ƀuôn Ma Thuột roh má 8, hơnăm 2023. Mâu tíu tê kơphế tê kơtê pơrá châ kơtúa ƀăng-rôl vâ kơnó. Mâu tíu tê kơphế ôh tá xing xoăng phĭu, kuăn pơlê ƀă tơmối troh a tíu tê kơphế pơrá châ ôu tê kơtê. Tiô chêh tối ing Khu pơkuâ kơmăi kơmok tê mơdró, 472 tíu ôu kơphế tung lâp kong pơlê kĭ veăng tơdroăng krếo tơmối ôu kơphế tê kơtê tung hâi lơ 10/3.

Tung mê, a pơlê kong kơdrâm Ƀuôn Ma Thuột ai 352 tíu tê kơphế tơdrêng ƀă 13 tíu tê troh lâp lu a troăng kân Phan Đình Giót, bêng Tân Tiến. Rơtế ƀă ăm ôu kơphế tê kơtê a hâi lơ 10/3, nôkố ai lối 50 tíu tê kô pro tơ’lêi hlâu ăm kuăn pơlê ƀă tơmối ôu kơphế tê kơtê sap ing 2 – 5 hâi tung pơla tơkŭm po leh tơbleăng.