Kơxo hâi lơ 10/3, Khu xiâm ngăn ‘na chiâk deăng ƀă mơnhông thôn pơlê tơrŭm ƀă Vi ƀan kong pơlê Dak Kak tơkŭm po leh hiăng kâng pro klêi rơchôa lối 1.600 rơtal liăn - tơmeăm khoăng, rơchôa têa Ea H’leo 1, tơmeăm khoăng ai pơxúa kal khât ƀă kơpong tơnêi ki kal têa dei tơring Ea H’leo. Pôa Trần Lưu Quang, Ngế pro xiâm phŏ hnê ngăn Chin phuh veăng leh hlối tiê nut ki pơxiâm tơbleăng hiăng klêi pro dêi tơdroăng tơkêa bro rơchôa.

Tơdrăng tơkêa kâng pro rơchôa têa Ea H’leo 1 châ Khu xiâm ngăn ‘na chiâk ƀă mơnhông thôn pơlê kĭ ‘no liăn mơjiâng pro a poăng hơnăm 2017, ƀă vê hdró mơjiâng pro châ tơdoăng 26 rơtuh m3 têa. Kố cho tơmeăm khoăng ki apoăng a kong pơlê Dak Lak ƀă kơpong Tây Nguyên ai rơchôa mơdât kroăng chiâng long kơdoăng têa meăn pro ƀă ƀê tông kâi trâng ki hngăm, xúa tơmeăm mơjiâng ki chiâng kơneăng. Long rơchôa têa kố  hdoăng têa kroăng Ea H’leo  vâ ai têa tôh tơniăn mâu loăng plâi kuăn pơlê; ai têa mơ’no ăm kuăn pơlê xúa ôu kâ rôh jíu, păn mơnăn, xúa kơmăi kơmok, ôm hyô...

Veăng ‘mâi mơnhông kơvâ pêi chiâk tiô troăng rơhlâ mơdêk ki pơxúa ƀă mơdêk krá tơniăn ton, mơnhông tơdroăng rêh ối dêi kuăn pơlê. Tiô vê hdró mơjiâng pro rơchôa mê kô châ xúa ƀă kô ai têa châ tôh ăm 5 rơpâu ha tơnêi klâng, deăng pêt loăng plâi, ai têa ăm dâng 15 rơpâu ngế kuăn pơlê xúa tung kơpong tơdroăng tơkêa bro.