Dak Lak mơ-eăm xo hnoăng liăn ngân tơnêi têa tung kong pơlê châ 10 rơpâu rơtal liăn tung hơnăm 2023. Kố cho môi tung mâu pơkâ nếo châ Hô̆i đong kuăn pơlê kong pơlê Dak Lak tơbleăng a hneăng hôp mơ’nui hơnăm. Hơnăm 2022, tơdroăng cheăng kâ – rêh ối pơlê pơla dêi kong pơlê Dak Lak châ tơƀrê hên. Tâi tâng xo hnoăng liăn ngân tung kong pơlê châ lối 9.100 rơtal liăn, hên má môi sap ing hdrối nah troh nôkố, tơkâ hluâ 37% tiô tối hdrối kơxô̆ liăn mơ’no tơnêi têa pơcháu.

Kố cho xiâm kối vâ Dak Lak mơ-eăm xo hnoăng liăn ngân tơnêi têa hơnăm 2023 tung kong pơlê châ lối 10 rơpâu rơtal liăn. Tiô pôa Bùi Văn Yên, Kăn pơkuâ Khu pơkuâ liăn ngân kong pơlê Dak Lak tối pơkâ xo hnoăng liăn 10 rơpâu rơtal kô châ drêng mâu tơdroăng tơkêa bro ‘na mâu on tơhrik vêh pro a Dak Lak hiăng chôa ‘lâng pêi cheăng.

Laga vâ châ pơkâ kố, sap ing apoăng hơnăm 2023, tâi tâng khu cheăng kal kí rơtế mâu khu tê mơdró, kuăn pơlê thế mơ-eăm hên tung tơdroăng pêi pro mâu hnoăng cheăng, troăng mơnhông mơdêk cheăng kâ – rêh ối pơlê pơla tiô mơgêi dêi Khu kăn pơkuâ hnê ngăn Đảng kong pơlê, Pơkâ dêi Hô̆i đong kong pơlê ƀă mâu tơdroăng xiâm hnê mơhno dêi Chin phuh, Ngế pro xiâm hnê ngăn Chin phuh.