Lâp kong pơlê Dak Lak nôkố ai lối 9.500 ha păn ká xi xŏng, kơxô̆ lối 33.000 tâ̆n rêm hơnăm. Hên kơpong kĭng têa kơxĭ, têa kroăng, long rơchôa têa kân păn ká tung hlâm hên, pro ‘mêi têa rơdâ, tơdjâk troh têa ƀă tơniăn kong kế. Kơxô̆ hlâm păn ká xi xŏng ai troăng tâk, rơtế ƀă tơdroăng pơkâ pêi, pơkuâ rak kong prâi tíu păn xuân ối trâm pá puât.

A roh pêi cheăng, Kăn pơkuâ hnê ngăn cheăng Đảng kong pơlê Dak Lak pơkâ mâu kong pơlê thâ séa ngăn, vêh pơkâ pêi tâi tâng kơpong păn ká xi xŏng. Pôa tối rơdêi, vâ kơvâ păn ká xi xŏng krá tơniăn, kal mơhnhôk xúa kŏng ngê̆ păn krúa lĕm, têa thế tơniăn lĕm, ti tăng xiâm kối.